Oovene veengeshefa dokuwapaleka omatuwa kOmbaye ove na oumbada wokukanifa eengeshefa davo nomaxupilo ovanailonga konima muni e va pa oivike ivali va kale va fiya po eenhele daye momunghulo wepandaanda loSam Nujoma Avenue nondjila yoIndependence.
Muni oshinima eshi okwe shi popya Etivali, ta ti omapekapeko aye aa mona kutya eengeshefa edi otadi longo dihe na ediminino nomikanda damuni.
Mwene wongeshefa umwe Sacky Andreas, e na ovanailonga ve li vahetatu, okwa ti oovene veengeshefa dokuwapaleka omatuwa okwa li va ningilwa oshoongalele kovanambelewa vamuni, omo va lombwelwa kutya onhele oyo otai ka longwa opate.
“Katu na oupyakadi nopate.
Opate nai longwe. Ashike kapu na ngaa onhele ya shaala po? Eli olo epulo letu,” Andreas ta ti.
Okwa ti kutya oovene veengeshefa edi ova lombwelwa konima yeedula nhatu ile nhee da pita komunambelewa wopolifi koshikondo shomeepate e na oshinakuwanifa shokuwilika eepate kutya onhele oyo okwa li ya nuninwa eengeshefa dokuwapaleka eepate.
Andreas okwa ti okudja opo ova tameka okulonga eengeshefa davo nokwa li tava futu oimaliwa okudja poN$5 000 fiyo oN$6 000 mohiila opo va mone omeva nolusheno.
Okwa ti ongeshefa yaye ohai wapaleke eeloli, mwa kwatelwa odo hadi umbata oikulya neeshi nohai dulu okuwapaleka di li o40 momwedi.
“Paife ohatu tembukile peni? Openi hatu ka tula omakondeina oo? Ngee omafiku o14 a pu ko, oshike tashi ningwa po?” osho a pula ngaho.
Mwene wongeshefa yoludi eli umwe, Rejoice Povanu, oo a kala nokulongela ponhele opo oule womido o12 noku na ovanailonga vatatu, okwa ti ova lombwelwa moshoongalele sha ningwa konima yeemwedi mbali kutya otava ka tembulwa.
Okwa ti okwa li va lombwelelwa kutya otashi dulika va ka tembulilwe konhele i li popepi nakadima mundilo, ashike inava pewa edu.
“Nave tu pe omanyamukulo kutya ohatu i lela peni,” Povanu ta ti.
Mathew Matongo, oo a kala nongeshefa yaye yokuwapaleka omatuwa oule womido heyali nokwa kuta ovanhu vatatu, okwa ti ongeshefa ohai yambidida eefamili.
“Ounona vetu otava xupu. Okashona oko hava mono apa, otave lipalwifa, otava palwifa ounona vavo.
Onghee nee, ngee otwa pate ngaho, ohatu i peni?” Matongo ta pula.
Elombwelo ola ti kutya oovene veengeshefa nava “xulife po oinyangadalwa aishe yopaipindi ihe li paveta”, tava kufa po “omatungo aeshe inaa pewa ediminino, oilongifo.
Omaumbo, eelamba, ominino domeva noinima ikwao ya pamba eengeshefa” ndee “tava fiye po onhele oyo ya nuninwa opate filufilu”.
Muni okwa ti onhele oyo ya nuninwa opate nai yele shaashi “opoloyeka yokulonga opate oya teelelwa peenhele apa”.
Oovene veengeshefa, nande ongaho, ova ti kave li ominge nopoloyeka yopate oyo ya fanekwa ashike ova hala okupewa onhele opo tava ka longela oilonga yavo manga inava fininikwa va fiye po ei.
Muni okwa ti ngee ova dopa okufiya po onhele ei moule womafiku oo va pewa, ota ka katuka onghatu puhe na vali elombwelo lasha.
Okwa ti eshi otashi dulika shi ka kwatele mo okutamanekwa kwoshimbuluma, okupewa ehandukilo loshimaliwa, okukufa po oinima ile okuteyaula po oinima yavo, okukwata ko oilongifo nokupata omeva nolusheno olo tali longifwa shihe li paveta.
Oovene veengeshefa ova ti ova hala muni e va kongele noku va pa onhele manga inava teyaula po eengeshefa davo.
