Osheetwapo tashi pula opaliamente i koleke Gerson Sindano a ninge omunashipundi wokomisi yomahoololo yaNamibia yedina Electoral Commission of Namibia (ECN) osha undulilwa komesho sha landula eanyo lakula okudja komuleli wongudu yoAffirmative Repositioning Job Amupanda.
Osheetwapo, osho sha li kotete momusholondodo woikundafanwa Etivali, otashi pula ediminino lapresidente Netumbo Nandi-Ndaitwah a ulike Sindano a ninge omunashipundi wokomisi yomahoololo pamwe novanambelewa vakula, Emmerentia Leonard naJulieta Ferreira.
Amupanda okwa ti ke na oupyakadi naSindano ashike okwa ti kutya ehoololo kali li pamwe nefinamhango nokatendo komahoololo.
“Osha undulilwa komesho.
Otwe lineekela kutya ova wapaleka omapuko napresidente okwa pewa omayele e li mondjila molwouwa wopashiwana. Otwa hala omauyelele oo, oidjemo nomapopilo okudja kupresidente,” osho a ti ngaho.
Amupanda okwa ti oshikako shaSindano shounambelewa akula mokomisi yomahoololo otashi pu ko momafiku 21 Juni 2027, osho tashi teya oveta shaashi omunashipundi woECN oku na okuhoololwa mokati kovanambelewa vakula vatano ndee ta longo oshikako shomido nhano.
Okwa ti kutya Sindano oku na manga okumana ko oshikako shaye ongomunambelewa akula opo nawa a tameka oilonga younashipundi, shaashi oveta otai pula oshikako shomido nhano di hadi mombelewa.
Amupanda natango oku udite kutya omhito younashipundi okwa li i na okushiivifwa moshiwana ndee tai ningilwa omapulaapulo, osho ta ti inashi landulwa.
“Paife ngaha, katu li ominge naye. Ashike Gerson Sindano pafinamhango nopakatendo komahoololo ina hanga okuninga omunashipundi. Itatu koleke oinima i li ngaha. Ohatu kondjifa oshinima eshi.
Ngee osho tava longo ngaha, otashi limbililike kutya otava ungaunga noveta ngahelipi,” osho a ti ngaho.
Eundulilokomesho eli ola tukulufa omalimbililo ape kombinga yeuliko eli tali pulwa, nomapulo paife otaa pulwa ngee ehoololo okwa li ngaa la ningwa kwa landulwa omilandu doveta.
