Minista wEhongo, Omaduto, Ovanyasha, Omaudano, Omaunghulungu nOmifyuululwakalo Sanet Steenkamp okwa pula ovakulunhufikola moshitopolwahoololo shaKunene va nghonopeke ewiliko nekalelepo loinima opo va xwepopeke oidjemo yovanafikola.
Steenkamp oshinima eshi okwe shi pula pefimbo loshoongalele novakulunhufikola newiliko lehongo moshitopolwahoololo kOutjo Etine. Okwa popya efimano lewiliko liwa meefikola mokuxwepopeka okuhonga noidjemo yelihongo.
Okwa tambula ko omikundu odo da taalelwa keefikola moshitopolwahoololo ndee ta pandula ovahongifikola molwelitulemo lavo tali twikile lokukwashilipaleka kutya eefikola nomihandjo otadi twikile nokulonga meenghalo didjuu.
“Eenghalo edi tamu longo mudo odi djuu shili ashike natango eefikola nomihandjo oda patuluka.
Ponhele yoministeli, onde mu pandula,” osho a ti ngaho.
Steenkamp okwa ti oidjemo yomakonakono i li xwepo inai lalakanenwa ashike pefimbo lomakonakono, ashike nai kale nokuyambididwa okupitila mokuhonga nokulihonga kwakeshe efiku momukokomoko womudo.
“Oidjemo ihai ningwa pefimbo lomakonakono, ohai etwa keshe efiku mongulu yofikola, okupitila melongekido lotundi liwa, ehongo lopamufika neyambidido lovanafikola lakeshe efiku,” osho a ti ngaho.
Okwa indila ovakulunhufikola va xwepopeke oidjemo meefikola davo ndee tava kwashilipaleke kutya ovahongifikola ove litula mo mokuyandja eetundi di na ongushu manga ovanafikola tava mono eyambidido la pumbiwa melihongo lavo.
Minista natango okwa popya kombinga yomumbwe yovaleli veefikola va yambule po oushili, ekalelepo loinima nomufika wopailonga uwa ngee tava wanifa po oshinakuwanifa shavo.
Okwa ti elongelokumwe pokati kovakulunhufikola, ovahongi newiliko lehongo moshitopolwahoololo okwa li la fimana mokukandula po omikundu nokuxwepopeka oidjemo yovanafikola.
Steenkamp okwa udaneka elitulemo lepangelo mehongo longushu ndee ta tu ovaleli veefikola omukumo va longe nelitulemo va kwashilipaleke kutya omudingonoko weefikola owa wapalela ovahongifikola novanafikola.
Okwa ti elitulemo loministeli nali kale nokuhololwa koilonga yakeshe efiku yeefikola, nakeshe omunafikola ta yambididwa nawa, keshe omuhongifikola ta longo noudiinini a pondole sha nakeshe ofikola tai lalakanene okuninga shomupondo.
Oshoongalele okwa li sha yandja omhito kuminista novakufimbinga mehongo moKunene va kundafane kombinga yelelo noikumungu ya pamba oidjemo yeefikola moshitopolwahoololo.
-Nampa
