Swapo okwa pula opo presidente waVenezuela Nicolas Maduro nomukulukadi waye, Cilia Flores va mangululwe meendelelo.
Hamushangandjai wongudu Sophia Shaningwa oshinima eshi okwe shi popya momushangwa Etivali.
“Ohatu pula twa mana mo emangululo la endelela lapresidente Maduro nomukulukadi waye, tashi mu pitike a tameke oilonga yaye yomayakulo oshiwana shaye puhe na nande omalidopemo a wedwa po,” omukanda osho wa ti ngaho.
Shaningwa okwa kelela oilonga yaAmerica oyo a longela Venezuela, ta ti kutya elongifo leenghono da puka puhe na etomeno lasha.
Okwa ti ongudu oi li pamwe novanhu vokoVenezuela, nosho yo Maduro naFlores, sha landula osho ta ti ekwatepo mbambyona laye inali teelelwa kuAmerica Olomakaya.
Swapo ita popile nandenande onghatu ei ya kufwa kuAmerica, oyo e wete kutya, inai landula nande oveta yopaiwana nosho yo eeveta doiwana ya hangana.
Omilandu di li ngaho, mwa kwatelwa eponokelo loshilongo tashi lipangele vene kovakwaita nokukwata po omuleli woshilongo e li koshipundi, ongudu oya ti, otadi teya omakwatafano opaiwana nodi li tadi dulu okupiyaaneka ombili mounyuni.
“Ohatu indile oiwana aishe nomahangano opaiwana a yambule po elipangelo loiwana oyo i li kuyoo vene nokuliufa unene keeveta dopaiwana, odo de tu kaleka kumwe ongounyuni umwe,” omukanda osho wa ti ngaho.
Okuteya omilandu edi, Shaningwa okwa ti, itaku kufa po ashike elineekelo mokati koiwana ashike natango otaku kateke eenghendabala dopamuhanga dokukondjifa ombili nelongelokumwe lopaunyuni.
Ongudu oya pula oiwana yopaunyuni, unene ngaa oiwana oyo i hole ombili muAfrica nomounyuni, opo i holole oukumwe wa pama kuVenezuela.
