Shuunamapya ota shi kwathele aalimimapya miilonga yawo oyindji

Uuministeli wUunamapya owa tseyitha omakwathelo ngono wa gandja kaakwashigwana ngaashi ha wu ningi omumvo kehe mokupulula,okugandja oombuto nuuhoho womvula ndjino naandji ta yiya (2012/2013), kiitopolwa ngaashi Oshikoto, Omusati, Oshana, Ohangwena, Kunene, Kavango, Caprivi, Otjozondjupa nOmaheke.

Pamushangwa ngoka gwa pitithwa kUuministeli wUunamapya, Omeya nIihwa Ominista yUuministeli mbuka omusamane John Mutorwa, okwa ti epangelo, ano uuministeli we otau gandja omakwatho koshigwana miitopolwa ya yooloka opo shi wape okulonga omapya gawo nawa no nuudhiginini, ya vule okumona eteyo ewanawa. Mutorwa ta ti uuministeli we owa gandja omambakumbaku geli omilongoheyali nagatano (75), iipululo yi li omilongombali niiheyali (27),omashina gokukuna ge li omilongoheyali na gatano (75) nuutemba wokuhilwa komambakumbaku wu li omilongondatu nuune (34) kiitopolwa ya tumbulwa metetekelo.Ootona dhili 349 dhuuhoho odha landwa nokugandjwa kaalimimapya miitopolwa ya tumbulwa metetekelo. Okwa gandjwa wo oodola dhaNamibia dhi li oomilliona mbali (N$2million) dhi na sha nokupululitha.Taku gandjwa wo oodola dha Namibia omilliona yimwe dhokuhelela nosho wo Oodolla dha Namibia omilliona yimwe mekwathelo lyoombuto, mbyoka ayihe nee kumwe ya ka eta pomwaalugwoodola dhaNamibia oomiliona ne (N$4million).Okwa gandjwa wo ekwathelo lyokuwapaleka nokulongekidha omapya. Aalimimapya oya pewa wo ekwatho kepangelo moka taya vulu okupululilwa nomambakumbaku gopaumwene, taya futu ashike ooN$200.00 mohecta. Okukuna nokuhelela nomambakumbaku gepangelo OoN$150.00.oku kuna nokutula mo uuhoho nembakumbaku lyepangelo nasho ooN$150.00. Okupulula nembakumbaku lyepangelo nasho OoN$150.00 omanga okuhelela ku na OoN$200.00. Ekwathelo lyokuwapaleka epya otali gandjwa paehecta ndatu kehe egumbo omanga aanamapya mbaka taya pewa ekwatho lyoombuto lyooperesenda 50.Kehe omumvo ekwatho ndika ohali gandjwa.