Ehangano loShack Dwellers Federation of Namibia, ola tunga omaumbo e dulife po530 koshimaliwa sha koya peemiliyona N$23 meedula omulongo da pita.
Eshi osha ningwa palongelokumwe nomahangano ngaashi FNB Namibia, Pupkewitz Foundation nOhorongo Cement.
Eshi kwa li ta popi poshivilo shekwashilipaleko onghela, omuyandjimayela akula kuminista womayambulepo eedoolopa noitopolwa yokomikunda Boniface Mutumba, okwa ti omaumbo a wedwa po e li o-60 otaa ka tungwa momudo tau ya meedoolopa da hoololwa ngaashi Karasburg, Oshakati nOtjinene.
“Onda lombwelwa kutya, okupitila momayambidido opashimaliwa okudja koshikondo shopaumwene, elongelokumwe nOhorongo Cement, FNB Namibia noPupkewitz Foundation aa yandja oshimaliwa shokutunga omaumbo e li 532,” osho a ti ngaho.
Keshe omukufimbinga okwa udaneka okuyandja omiliyona modula tai ya. Oimaliwa ohai longifwa okuyambidida okutunga omaumbo.
Omukulunhu woFNB koshikondo shoikwangeshefa, Phillip Chapman, okwa yeleka oidjemo yopolohalama koGobabis, oko eenhele di dule pefele da wapalekwa molukanda loFreedom Square.
Oshilongo ashishe, okwa ti omaumbo e li lwopo3 300 otaa tungwa paife okupitila meenghendabala dehangano.
“KoGobabis, otwa mona oidjemo yoilonga ei okupitila mokuwapaleka eenhele di dulife po1 100 moFreedom Square.
Eshi hatu popi ngaha, oidjemo oyo otai i pombada oshilongo ashishe, nomaumbo e li 3 300 taa tungwa paife molwoilonga yehangano.
Ongomukufimbinga wefimbo lile, ei oyo oidjemo twa hala okumona oshilongo ashishe,” osho a ti ngaho.
Omukulunhuwiliki woPupkewitz Foundation, Meryl Berry, okwa ti ehangano ohali yandje omayambidido alushe okupitila meyandjo loitungifo yongushu yomiliyona keshe omudo.
“Oimaliwa ohai longifwa nawa, oidjemo oi liwetikile. Kakele kokuyandja omaumbo, oshinima eshi otashi yambula po eliko moshilongo, tashi yambidida etoto loilonga nokuvatela omaumbo e limonene oiyemo,” osho a ti ngaho.
Okwa weda po kutya omulandu ou wehangano owa dja mekufombinga loshiwana, tashi ongele oimaliwa meengudu nokukufa ombinga sha manguluka momafaneko nomokutunga.
Omukalo ou otau pitike eepoloyeka di nyamukule nawa keemumbwe doshiwana.
– THE BRIEF
