Minista wOmayambulepo Eedoolopa nOmikunda, James Sankwasa okwa indila eekamusela di kale nokutalela eepoloyeka odo da tulwa moilonga moikandjohoololo yado opo kukwashilipalekwe kutya oilonga otai i komesho nawa ngaashi ya fanekwa.
Edi Sankwasa okwe di popya Etine pefimbo leyandjo lomaumbo a tungwa koshi yoMass Housing Development Programme kOtuzemba Extension 2 mOpuwo.
Okwa ti eekamusela odi na omhito iwa yokutofa mo omikundu odo tadi i moshipala eepoloyeka depangelo meenhele dado. Odi na yo okulopota omikundu odo komalelo omondjila.
“Eekamusela doitopolwahoololo nadi kufe ombinga meepoloyeka odo di li moikandjohoololo,” Sankwasa ta ti.
Okwa ti eepoloyeka domayambukepo moikondo ngaashi ounamapya nounaimuna, ehongo, oundjolowele neepate nadi wilikwe paikandjohoololo opo kukwashilipalekwe kutya oda eta eyambukepo moitopolwa yokomikunda.
Sankwasa okwa twa omukumo eekamusela di talele po eenhele doilonga yeepoloyeka, tadi talele eyokomesho ndee tadi yandje omanyenyeto opo eepoloyeka tadi katekwa ile inadi tulwa moilonga pamilandu odo da pumbiwa.
Minista okwa ti ovanambelewa vepangelo ova ulikwa ile va hoololwa va yakule oshiwana nonghee nee nava pulwe va kalele po eyandjo lomayakulo neepoloyeka domayambukepo.
Mayola wOpuwo Kasipo Kakondo okwa tambula ko eenghundafana daminista nomalelo eedoolopa, ta ti ewiliko lodoolopa natango ole litula mo mokuyambula po Opuwo.
“Eholokepo loye apa nena otali holola elitulemo lepangelo lokukwashilipaleka kutya Ovanamibia inava patelwa kondje,” Kakondo ta ti.
Okwa popya kutya ewilikongudu neekamusela otava twilile nokulonga va yambule po odoolopa nokuyambula po ongushu yovakalimo.
“Ongamayola weni, pamwe neekamusela dange, ohatu udaneke kutya ohatu twikile nokukondjifa exumokomesho, eyokomesho nongushu yovanhu vetu,” Kakondo ta ti.
Okwa ti vali eyandjo lomaumbo oshinima sha fimana mokukandula po omumbwe yomaumbo mOpuwo.
Kakondo okwa indila ovo va mona omauwa omaumbo opo ve a file oshisho, ta ti omaumbo kae shii ashike omalukalwa ashike ohaa yandje eameno nekanghameno lonakwiiwa i li xwepo.
Okwa holola vali epandulo kehangano loNational Housing Enterprise, ovatungi novakufimbinga aveshe va kwatelwa mo eshi va manifa opoloyeka ei.
-Nampa
