… epangelo olo tali ka tokola eehombo adishe
OvaNamibia ovo ve na ondunge yokuya meehombo monakwiiwa otava ka pumbwa okuya koministili yoikwameni omanga ku na eemwedi nhatu va ye mohombo.
Eshi otashi ningwa opo kukolekwe kutya kapu na omunhu e li nale mohombo imwe.
Oshinima eshi osha popiwa monotwaveta yohombo oyo tai kundafanwa paife mopaliamente tai lalakanene okukelela ovanhu va ye meehombo novanhu ve na eehombo inadi teka natango.
Haende Dianne Hubbard, moshinyolwa shokoshifo oshivike sha dja ko, okwa li a popya kutya oshinima eshi otashi shunifa pedu oibofa yo vanhu tava i meehombo novanhu ve li meehombo dimwe moshilongo.
Okwa ti ohombo oyo otai ka shiivifilwa oshiwana, opo ku yandjwe omhito kwaavo ve na oupyakadi wopaveta nohombo oyo ve i ye moshipala, ashike ou a yandje ouyelele uhe li mondjila opo a kaleke ohombo oyo ota ka ya moshipyu shaashi otashi talika ko kutya oshimbuluma.
“Ovalihomboli otava ka hoolola nomukalo wokuungaunga nomalika avo mohombo pefimbo apa, osho tashi va pe efimbo opo va ungaunge noilanduli yoshimaliwa mohombo. Eshi otashi yandje efimbo la wana kovanambelewa opo va mone kutya kapu na nande omunhu e li nale mohombo imwe, onghee nee otashi kelele ovanhu vaha ye meehombo novanhu ve li meehombo dimwe inadi teka,” Hubbard osho a ti ngaho.
Okwa ti onotwaveta natango otai ka yandja efimbo kovanambelwa opo va koleke kutya ovanhu ovo va hala okuya mohombo ovakula nokuyandja ediminino lopaumwene lokuya mohombo.
Omutotiveta Maximalliant Katjimune okwa popila oshinima eshi, ta ti otashi dulika sha pumbiwa mokukwashilipaleka kutya oilanduli aishe oyo hai di mokumanifa eehombo oya ungaungwa nayo kovanambelewa.
Eshi osha kwatele mo okumona kutya povanhu ovo va hala okuya mohombo kapu na umwe e li nale mohombo imwe, pamwe noinima imwe yopaveta.
“Otwa itavela kutya oshinima eshi otashi ka vatela novanambelewa opo va dule okumona kutya ohombo oyo ya alika pokati kOmunamibia nomunailongo oyo shili ngaa ile otai ningwa nomalalakano e lili, ngaashi okumona omaufemba noukwashiwana,” Osho a ti ngaho.
Okwa ti kutya ovakainhu vaNamibia otava longifwa nai okupitila momukalo ou.
“Onghee nee eemwedi nhatu odo odi na okukala da wana okulonga mo oinima aishe ei manga ohombo inai manifwa,” Katjimune osho a ti ngaho.
Omupeduwiliki wongudu yoNamibia Economic Freedom Fighters (NEFF) Longinus Iipumbu okwa ti oshinima eshi tashi pulwa konotwaveta yohombo kutya ovanhu ovo va hala okuya mohombo nava popye omalalakano avo moule weemwedi nhatu otashi lalakanene okukwashilipaleka kutya ovanhu ova ya meehombo va tala nawa nopahalo lavo aveshe.
“Otashi vatele oinima ihapu, ngaashi okukelela eehombo doikengelela, shaashi efimbo lokuteelela otali dulu okukelela ohombo yomuheka ile odo da ningwa pamatilifo nopaumbudi. Otashi ya ndje omhito kepangelo opo li mone oukwashili wekwatafano olo,” Osho a ti ngaho.
Iipumbu natango okwa ti otashi kwashilipaleke kutya ovanhu ova ninga omatokolo opamufika nokuli mondjila.
“Efimbo eli otali vatele ookaume ava opo va talulule nawa etokolo, okukundafana oikumungu ya fimana kombinga yohombo nokukonga exungomwenyo lopetameko lohombo, ngee osha pumbiwa.” Oshinima shimwe sha fimana omutotiveta a tumbula osho sho kutya onotwaveta otai yandje efimbo lokulongekida omikanda.
“Efimbo eli otali pe omahangano epangelo omhito ya pumbiwa yokuungaunga nokulongekida omikanda dopaveta nokutala nawa poinima aishe oyo ya pumbiwa,” Omupedu pelesidente woNEFF osho a ti ngaho.
Okwa itavela kutya osho sha monika kuHubbard otashi dulu okweeta shihapu, unene ngaa ngee opu na oumbangi tau dulu okupopila oulefimbo weemwedi nhatu odo tadi popiwa kutya otau dulu okweeta oidjemo iwa.
“Pamadilaadilo ange, omanga oulefimbo tau lalakanene okwaamena oukwashili wohombo, osha fimana okufimaneka osho ovanhu va hala paumwene.”
Okwa ti ngee efimbo eli otali fininike unene ile otali fininikile ookaume ava omaupyakadi, otaku dulu okupulwa opo li wedelwe opo kukwashilipalekwe kutya otali yambidida ponhele yokuya moshipala, oshinima.
‘OMADEULO OVANAMBELEWA’
Hubbard okwa ti oshinima shimwe shiwa vali monotwaveta omadeulo noipumbiwa yovanambelewa veehombo ovo veheshi omagestrata, shaashi oufemba wa keshe umwe ongomuhombolifi otau dulu okukalekwa ngee okwe liumbata nai.
“Otaku ka pulwa eendado deehombo ndee otashi ka kala oshimbuluma ngee omuhombolifi okwa tambula ondado ihe li paveta ile omaano.
“Ovahombolifi ovo ve shi kutya ohava longifa eenghonodeembelewa davo papuko navo otava ka tamanekelwa oibofa ya yooloka,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
