Presidente Netumbo Nandi-Ndaitwah okwa pula oshikondo sheendaadi sha Namibia shedina Namibia Central Intelligence Service(NCIS) shi konakone ovanambelewa voministeli youndjolowele ve li 360.
Oshinima eshi osha landula omapopyo ekengelelo noulingilingi moministeli.
Ovanailonga ava ova dja unene koshikondo shoikwamiti shoministeli youndjolowele nomakwatafanao opanghalafano, kofitola ya kula yomiti.
Oko kwa kala eendaka kutya ovanailonga vepangelo otava longele kumwe novanangeshefa ngee tashi ya keetendela nokudanena onduba yomiti dongushu yeemiliona.
Elombwelo lapresidente okwa li la yandjwa kuminista wombelewa yaye Charles Mubita, kuminista Esperance Luvindao woundjolowele.
Etumwalaka olo tuu eli natango okwa li la lombwelwa ehangano loNamibia Central Intelligence Service komukulunhuwiliki woundjolowele nomayakulo opanghalafano Penda Ithindi.
Momukanda wa shangwa momafiku 27 Apiilili, Mubita okwa ti presidente okwa talulula omulandu wovanailonga koshikondo shomayakulo opaunamiti ndee ta pula kukonakonwe pambelewa ovanailonga ovo ve li keefitola domiti.
“Presidente okwa talulula omusholondodo wovanailonga moshikondo shomayakulo opaunamiti okudja muApiilili 2026,” Mubita ta ti momukanda.
Okwa weda po kutya presidente okwa yandja elombwelo kutya omakonakono inaa ningilwa ashike ovanhu vamwe, pakutala komakonakono oo e li nale metifa moshikondo omu.
“Presidente natango okwa yandja omayele koministeli youndjolowele nomayakulo opanghalafano i yandje omukandaindilo koNamibia Central Intelligence Service i konakone ovanailonga aveshe moshikondo shomayakulo oikwamiti…,” Mubita osho a ti ngaho.
Omakonakono aa otaa ka ningilwa ovanailonga vomoKhomas, nosho yo ovo ve li keemhungulilo domiti koRundu nOshakati.
Mubita okwa ti elombwelo ola landula eshiivifo lopaliamente lomakonakono ekengelelo olo tali feekelwa la ningwa keefitola da kula domiti, mwa kwatelwa omafeekelo “okundanena ouyelele womiti noku di yukifa keenhele da puka”, novanailonga ovo tava tamanekelwa oshinima eshi ova lundululwa nale nokuli fiyo omakonakono a manifwa.
Mubita natango okwa yandja elombwelo koministeli opo i kale tai yandje ouyelele womulandu womakonakono.
“Lombweleni presidente oidjemo yomakonakono oNCIS,” osho a ti ngaho.
Momukanda wa yooloka wa shangwa momafiku 27 Mei, Ithindi okwa koleka kutya oministeli oya yandja eefooloma di li 193 domakonakono ovanailonga ovo va tofwa mo momudo 2025.
Ashike nee, oNCIS okwa li ya pula opo eendodo doilonga odo tadi konakonwa di tofwe mo nokumonike ediminino okudja kOkabinete manga omulandu womakonakono inau tameka.
