Ongudu yoIndependent Patriots for Change (IPC) oya pulwa i ulike osho ya ninga po kombinga yomayambulepo opanghalafano moshilongo.
Omunapaliamnete woSwapo Salomon April okwa pula osho ongudu yomilameno yopambelewa ya ninga po i yambule po eenghalamwenyo dovanhu noimaliwa yoshiwana oyo ya mona.
“Shaashi ohamu liifana epangelo lopomunghulo nomadina aeshe awa, omwa ninga po shike kombinga yomayambukepo opanghalafano mu ungaunge nomikundu odo da taalelwa kovanhu vetu, noimaliwa oyo mwa mona, opo mu shakeneke epangelo ondjilakati?” April ta ti.
Ta nyamukula komapulo Etitatu, omuleli wongudu yomilameno yopashiwana Imms Nashinge okwa ti oimaliwa oyo hai pewa eengudu dopolitika odo da kalelwa po mOmutumba wOpashiwana oya nuninwa okuyambidida ekufombinga lado moudemokoli wopaliamente, ponhele yokulongifwa meepoloyeka domayambukepo meyukililo.
“Ngee otwe i longifa po oinima imwe ohatu kala mo nai kOkomisi yOmahoololo yaNamibia,” osho a ti ngaho.
Nashinge okwa weda po kutya Okomisi yOmahoololo yaNamibia ohai yandje omilandu da yela nghee oimaliwa ei i na okulongifwa.
Oveta yomahoololo otai ti, eengudu dopolitika odo tadi mono oimaliwa yoshiwana oda teelelwa di kale di na ouyelele wa yela kutya oimaliwa oya longa shike nosho yo okuyandja omikanda doshimaliwa dokomudo kokomisi opo kuxwaxwamekwe ekalelepo loinima nelongo lopauyelele.
