Omunapaliamente wongudu yoNational Unity Democratic Movement Vetaruhe Kandorozu okwa londwela kombinga yokupatela ovalumenhu kondje ngee tashi ya keyandjo loilonga, ta ti kutya ovalumenhu novakainhu nava mone eemhito di fike pamwe.
Omutumba wOpashiwa owa dimina ovanambelewa ve na sha nouyuki ngee tashi ya komayandjo oilonga, ovo oshikako shavo tashi i fiyo omomafiku 29 Febuluali 2028.
Eshi kwa li ta popi pefimbo lomutumba kombinga yovanambelewa vakula vokomisi i na sha nomayandjo oilonga yedina Employment Equity Commission, Kandorozu okwa ti omahangano amwe ee hadi ovakainhu momalelelo.
“Ovakainhu, ovakainhu ovakainhu. Oshiwa unene, ashike omafimbo amwe otwa dimbwa ovalumenhu. Opu na omahangano, oshihopaenenwa, e na ovanambelewa vakula, ndele vanhe vomuvahamano ovakainhu. Ovalumenhu ashike vavali. Otwa pumbwa kutala nawa,” osho a ti ngaho.
Okwa pula Okomisi yOmayakulo Oshiwana i pule kuningwe omauliko efike pamwe, ta popi kutya ovalumenhu otava patelwa kondje ashike ova pumbwa eemhito di fike pamwe, unene ngaa ovanyasha ovo va dalwa konima yemanguluko.
Kandorozu okwa popya yo vali kombinga yeenhele doilonga inadi valula ovanhu ve na omaulema, ta indile ovayandji voilonga va tule po eenhele, mwa kwatelwa oundjuwo va nuninwa ovanhu ovo ve na omaulema.
Omunapaliamente wongudu yoIndependent Patriots for Change Lucia Mbuti okwa ti okomisi nai ungaunge noinima ihe na ouyuki meenhele doilonga ndele tai xwaxwameke omidingonoko doilonga da amenwa nodi na ouyuki.
Okwa pula eelopota dopauyelele, eendodo deendjabi di li xwepo nepopilo lomaliumbato awa kombinga yoilonga, ta ti kutya oveta oyo tai pula ovanhu va mone eemhito di fike pamwe ngee tashi ya koilonga neemhito momalelo nai longifwe moikondo aishe.
Mbuti okwa indila okomisi i kale nokutalela po eenhele doilonga inashi shiivifwa opo i talele nghee ovayandji voilonga have liumbatele ovanailonga.
Natango, Lilani Brinkman okwa ti okomisi ei inai kala ashike ya tala kutya olyelye ta pewa oilonga, ashike nai tale yo kwaavo tava mono omadeulo, tava yelwa nokumona eemhito momalelo.
Minista wouyuki noipambele yoilonga Fillemon Immauel okwa ti okomisi oya pewa oilonga yokuungaunga noinima ihe li pauyuki yopandjokonona ya dja pefimbo loukoloni.
