Ehangano ledina Namibia Development (Namdef) Trust otali ka ninga oshoongalele shomafiku avali shi na sha nokundombola inaku pitilila mOvenduka moshivike tashi ya.
Oshoongalele eshi shi na sha neenghundafana dokundombola pamukalo otashi ka kala ko momafiku 08 fiyo 09 June.
“Koshoongalele eshi shokundombola pamukalo otaku ka kala ovawiliki, oovene veengeshefa dokundombola, ovaxungimwenyo, ovapekapeki, omahangano omoshiwana novanhu ovo va kumwa opo va kundafane pamukalo uwa tau eta elunduluko,” Timotheus Angala wokoNamdef osho a ti ngaho.
Eenghundafana edi ode ya mokati komanyenyeto okundombola taku ningi kuhapu, unene ngaa okupitila moubeetinga nokundobola komalungula.
Angala okwa ti oshivilo eshi otashi lalakanene okutota eenghundafana dekwatelemo kombinga yokundombola inaku pitilila moNamibia, tadi nghonopeke ekelelo nomilandu dopetapeko, tadi ka popya kombinga youpyakadi wokundombola meenhele doilonga u na sha nedingonoko lomadilaadilo neengunga nosho yo okuxwepopeka omayakulo exungomweno nevyulonghalo.
Ehangano oli na etelameno kutya eenghundafana edi otadi ka ninga omafaneko okutota omulandu tau wilike omafaneko omonakwiiwa nomilandu deameno lopanghalafano.
She likolelela kuNamdef, okupikwa kokundombola okwa ninga omukundu wa kula wopanghalafano, unene ngaa mokati kovanyasha ovo va taalela okuhena oilonga nomikundu dopashimaliwa.
“Eshi ondodo yokuhena oilonga i li pombada, ovaxungimwenyo novaleli voshiwana ova londwela kutya ovanyasha vahapu moNamibia, mwa kwatelwa omwaalu uhapu wovalumenhu, ova tanaukila koubeetinga ‘ongomukalo wokuwedela oiyemo’,” osho a ti ngaho.
Ehangano ola holola omalimbililo kombinga yokundombola momalukanda ngaashi meendingosho, meembaa nokomalungula oko eameno lovandomboli la ngabekwa ile lihe po ashike nandenande.
Eenghundafana edi oda landula eindilo lopashiwana la ningwa mafiku aa komunhu oo a pikwa kokundombola ta pula eenghendabala donhumba okudja kewilikongudu lokundombola moshilongo..
Petameko lomudo ou, Jason Kauhondamwa (37) okwa li a ninga edilo moshiwana opo eengeshefa dokundombola di mu pate mo meenhele dado.
Kauhondamwa okwa lombwela oThe Namibian kutya okupikwa kwaye kwokundombola okwa tameka eshi kwa li mushona konima kwa li a mona omunhu a lya eshina mombaa.
Okwa ti ohokwe yaye yokundombola oya ninga ihapu, osho sha eta a kanifa oshimaliwa shi fike lwopoN$500 000 modula.
“Keshe efimbo ndi na oshimaliwa, ohandi i,” osho a ti ngaho.
Kauhondamwa okwa yandja oushima kewilikongudu lokundombola eshi vati la dopa okutula moilonga eindilo laye opo a ngabekwe okundombola.
Eshi ehangano loNamibia Gaming and Entertainment Control Board, la nyamukula, omukulunhuwiliki walo John Erastus okwa ti ewilikongudu ola tambula ko eindilo laKauhondamwa nola hangwa li li mondjila yokukundafana nheele dokundombola.
Erastus okwa ti omulandu ou okwa li tau pula efimbo lile neenghono.
Namdef okwa ti ota tula moilonga opolohalama yaye yokundombola kwaamenwa.
