Ovanhu vavali ova xulifila moshiponga omanga vakwao ve li vanhe va ehamekwa moshiponga sha ningwa mondjila yoB1 pokati kOshivelo nOmuthiya Etitano.
She likolelela kolopota yoiningwanima yopolifi yexuliloshivike ya dja komupopiliko wopolifi, omupedu komisina Kauna Shikwambi, omukainhu (18) nomulumenhu (40) ova xulifila poshiponga konima osheendifo shoipundi iheyali sha alangata eshi sha topa elola.
Ovatwaalelwa vakwao ve li vanhe, mwa kwatelwa omushingi, ova lemanekwa lela.
Moshiningwanima sha yooloka komukunda wedina Katondo popepi noRundu, Gabriel Regina Mbava (47) vati okwa xulifa eshi a pumwa kotuwa ndee tai faduka po.
Opolifi oya ti omushingi wokatuwa kashona koToyota vati okwa faduka po sha landula oshiningwanima nokakwa li a mangwa po natango.
Moshingwanima shikwao, Fillemon Nikodemus Nadhipite (41) okwa xulifa konima eshi a lyatwa kokatuwa kokaKia mondjila yoC46 pokati kOngwediva nOndangwa onguloshi yEtitano.
Omushingi wosheendifo, oo vati kwa li ta shingi e li koshi yondungo, okwa mangwa po. Natango, oshiponga shololi shi nyanyalifa osha lopotwa mondjila yoB8 popepi noChetto ongula yOlomakaya.
Opolifi oya ti ololi imwe vati oya ya kombinga ya ikwao, osho sha eta ikwao i alangate oikando ya yooloka.
Omushingi wololi onhivali, Simasiku Ricky Simasiku, okwa xulifila poshiponga, omanga ovatwaalelwa vakwao va mona oshiponga.
Omushingi ou vati a eta oshiponga okwa mangwa po nokwa li a teelelika a holoke momhangu onghela.
Opolifi oya lopota vali oiminyeka mexuliloshivike.
Ovalumenhu vanhe va homata mOvenduka, vati ova pa ombwa oudiyo manga inave liteyela meumbo moLudwigsdorf eevili dongula yEtitano.
Ovatamanekwa vati ova manga ovaneumbo ve li vatatu, tave va denge ndee tave va patele mokandjuwo manga inava twikila nokuvaka mo oinima yongushu yoshimaliwa shi fike poN$21 000.
Ovalumenhu vahamano vahomata mOmbaye ova ya meumbo okupitila komuvelo wokonima yeumbo ndee tava mange ovaneumbo vavali.
Vati ova kufa mo omushasho, oikwa kompiuta noshimaliwa keemuma shi fike poN$3 000.
ongushu yoinima aishe ei ya vakwa otai tengenekwa i fike poN$211 500.
Kapwa li nande omunhu a mangwa po ile oinima ya monika mominyeka adishe edi pefimbo lolopota ya pitifwa.
Moshiningwanima shimwe sha yooloka komukunda Omuhongo-Onanyama moshitopolwa shaPembe, omulumenhu (20) okwa tulwa moipandeko eshi vati a kwata keenghono omukulupe (76).
Omutamanekwa oku li konima yekumba. Opolifi natango oya didilika omafyo a yooloka taa konakonwa kutalike ngee omalikufo eemwenyo ile aa etifwa koshike.
Kakele koimbuluma, opolifi oya kwata ko oifufuta i li o43 neudo, omanga elongelokumwe lopolifi paiwana la eta ovafufi va kwatwe po noyeendifo oyo ya vakwa i monike.
Eshi okwa li sha hololwa kuShikwambi, oo ta ti ekwateko loifufuta oli li ombinga yeenghendabala dopolifi di li metifa dokukelela oimbuluma nokunghonopeka eameno loshiwana.
Okwa ti ovanhu vavali ovo kwa li tava kongwa kEhangano lOimbuluma yOpolifi lOpaiwana okwa li va tulwa moipandeko pokati komudo 2024 no2026 okupitila melongelokumwe lopolifi yopaiwana.
Pakuweda po, oyeendifo i li o12 oyo kwa li ya vakwa po ndee tai pitifwa eengaba daNamibia okwa li ya monika pefimbo olo tuu eli.
Omivalu edi okwa li da hololwa eshi opolifi kwa li tai lilongekidile okudimbuluka Efiku lOpaunyuni lOiwana yaHangana lElongelokumwe lOpolifi onghela.
