Maria Tomas (80) womomukunda Oshiya Shamatope moshitopolwahoololo shaShikoto Etivali okwa mona omaano oinima yomeumbo ya fimana okupitila mombelewa yoshikandjohoololo shaMuthiya.
Omaano, oo aa kwatela mo ombete netalashe, aa yandjwa sha landula etalelepo leumbo lomukulupe ou kukamusela woshikandjohoololo Erastus Nekomba oshivike sha dja ko Etitatu, olo la didilika onghalo yomukulupe itai nuwa omeva.
Pefimbo letalelepo, Nekomba novanambelewa okudja kOministeli yEfikopamwe lOukashikekookanhu nOnghalonawa yOunona nopolifi ova didilika kutya eumbo lomukulupe oli li monghalo ihe shi iwa nandenande.
Konima Nekomba okwa yandja omaano oipeleki opo omukulupe a tungilwe onduda ndee tau daneke yo oikulya yoshikukuta.
Pefimbo opo, Tomas okwa lombwela ovanambelewa kutya okwa kala ita filwa oshisho noimaliwa oyo kwa li apa ovakwapata yokulanda oitungifo yonduda yaye oya longifwa po oinima imwe.
Eshi kwa li ta popi peyandjo loinima ei Etivali, Nekomba okwa pandula oshiwana osho sha yambidida.
“Onda hala okupandula oshiwa osho sha yambidida kulundululwe onghalo omo mu na Maria Tomas.
Eyambidido leni ola alula etelameno nefimano lomukupe womomudingonoko wetu,” osho a ti ngaho.
Okwa ti eyambidido ola ulika efimano lelongelokumwe loshiwana mokuyambidida ovanhu ovo tava mono oixuna nokutwa vakwao omukumo va twikile nokuyandja omayambidido kwaavo ve a pumbwa.
Tomas okwa pandula Nekomba unene nakeshe umwe a yambidida.
“Onda hala okupandula keshe umwe,” osho a ti ngaho.
Nekomba okwa londwela ovanhu vaha ekeleshi nokumonifa ovakulupe oixuna konima eshi a didilika ovakulupe vahapu moshikandjohoololo tava monifwa oixuna.
Okwa pula oshiwana shi lopote ovakulupe ovo tava mono oixuna opo va dule okupewa omayambidido.
-NAMPA
