Oshikondo shipe she likalekelwa shokuyakulila ovanambelewa vakula vepangelo moWindhoek Central Hospital osha eta omasheko okudja kovanhu va yooloka, vamwe otava ti inashi fimaneke omayakulo opaunamiti oshiwana e fike pamwe nosha nyika okatongotongo.
Eshi osha landula elombwelo lapresidente Netumbo Nandi-Ndaitwah kutya ovanambelewa aveshe vakula vepangelo nava tameke okulongifa omayakulo opaunamiti epangelo okudja mulotete lomwedi ou, omulandu tau lalakanene okuxwaxwameka eyandjo lomayakulo opaunamiti li fike pamwe kovanhu aveshe.
Ashike nee, okwa li pwa tulwa oshitulwa showina shokuhakulila ovanambelewa va kula vepangelo nokwa li sha patululwa moshivike omo elombwelo lapresidente la ya moilonga, omanga oshiwana tashi twikile nokukala shi li momikweyo diledile opo shi dule okumona epango moipangelo yepangelo.
Eshi oThe Namibian kwa li ya talela po oshikondo showina eshi moWindhoek Central Hospital Etitatu, ovapangi ova yeleka kutya osha nuninwa ashike ovanambelewa vepangelo.
Eshi osha kwatela mo eeminista, ovapedu minista noilyo imwe yopaliamente.
Minista woundjolowele nomayakulo opanghalafano, Esperance Luvindao pefimbo letalelepo nomuprima minista Elijah Ngurare koshipangelo oko konima yoivike ivali ya pita okwa ti: “Heeno, eshi osho vanambelewa ashike vakula vepangelo, ashike omunhu keshe e na okakalata komayakulo opaunamiti e wete kutya eli e hoololo liwa kuye, ota dulu okuuya ndee ta hakulwa.”
Omupedu minista woundjolowele, Hambeleleni Ndjaleka okwa ti okutalela po oshipangelo shepangelo a mone omayakulo kashi shii shipe kuye, ndee “paife tashi hafifa unene” molwomulandu upe.
“Onda kala alushe nokuya koipangelo yepangelo ndi ka pangwe – manga nokuli inandi mona omhito yange yoilonga ipe – ashike inandi kala nande ndi na oupyakadi nasho.
Kandi liudite natango, ame inandi pumbwa epango. Ashike ngee nde liudu, ohandi ka talela po lela oshipangelo shepangelo.
“Ovanambelewa vakula vepangelo kave shi lela ovafimanekwa nonda hala oku shi yeleka nawa kutya oshipangelo inashi tongola, ashike osha tambula ko ovanhu aveshe ovo tava dulu okuyakulwa,” osho a ti ngaho.
Ashike omupopiliko woministli youndjolowele, Walters Kamaya okwa ti ovanambelewa ashike vakula vepangelo tava ka pangwa moshipangelo omo mondodo yotete yetulomoilonga, novapambele vavo ovo hava longifa oukalata vavo vomayakulo opaunamiti itava ka longifa nande oshikondo eshi shipe opo sha totwa.
Okwa ti ovanailonga vakwao vepangelo, ngaashi ovahongifikola novapangi, itava ka longifa nande oshikondo eshi.
“Ondodo yotete oyo vafimanekwa ashike.
Ovahongifikola novapangi ovafimanekwa? Havanailonga aveshe vepangelo va kwatelwa mo.
Ondodo ei otai tale ashike ovanambelewa vepangelo vakula ve li 294,” osho a ti ngaho.
Kamaya okwa ti oikondo ikwao ya fa eshi otai ka tungwa kOshakati, koRundu, Walvis Bay, Keetmashoop nOnandjokwe.
‘OKATONGO’
Omuleli wongudu yoPopular Democratic Movement (PDM), McHenry Venaani okwa pula kutya omolwashike pu na oshikololo she likalekelwa shovanhu vamwe ngee epangelo ola hala okutota oshikondo shoundjolowele shopauyuki.
Okwa ti shapo epangelo nali yambule po ashike oWindhoek Central Hospital aishe molwouwa wovanhu aveshe.
“Okukala pu na okakololo ke likalekelwa kovanhu ashike vamwe otashi ulike osho kwa li sha ningwa kepangelo lokatongotongo moshipangelo omo, eshi kwa li ashike sha ningwa shovatilyane.
Ngee owa hala okukala u na omulandu uwa, omayakulo naa kale e lifa. Omolwashike e na okutopolwa?” osho a pula ngaho.
Omuleli wongudu yoIndependent Patriots for Change (IPC), Panduleni Itula okwa ti oveta otai pula efikopamwe neyandjo lomayakulo lihe na okatongo, kutya nee omunhu owondodo ilipipo moshiwana.
Okwa ti etokolo lokutongola mo ovanambelewa vepangelo vakula moshiwana ola teya oveta.
Omundjadjukununi woikwapolitiak Rui Tyitende okwa ti ngee epangelo ole litula mo shili mokulundulula oshikondo shoundjolowele, oshiwana ashishe nashi kale tashi dulu okulongifa oipangelo imwe.
Okwa ti okatopolwa ke li kalekelwa otaka ulike kutya ovakwashiwana inava pumbwa omayakulo opaundjolowele ongushu, ashike ovanhu ovo va hoolola ove a pumbwa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
