Eengeshefa da kula dihapu odi na eengunga dovanailonga di dulife pomiliona oshinghwanyu nhano.
Ouyelele ou owa tala ashike pokati kaApiilili naJuni neudo.
Oministeli yOuyuki nOipambele yOilonga oya lombwela oThe Namibian Etivali kutya oya didilika oshimaliwa shi fike pomiliona imwe oshinghwanyu nhano moule weemwedi nhatu sha kwatakanifwa nomanyenyeto opailonga e li 1 241.
Oimaliwa ei oya kwatakanifwa neendjabi inadi futwa, okunanwa kuhe li paveta noimaliwa ikwao inai yandjwa kovanailonga.
Omupopiliko woministeli Maria Hedimbi okwa ti omwaalu ou kau shi omauwa ovanailonga ashike eendjabi.
“Kashi fi omauwa, ashike oimaliwa yovanailonga inai yandjwa,” Hedimbi ta ti.
Okwa ti omatalelo oministeli aa didilika omikundu dihapu, mwa kwatelwa eendjabi inadi futwa, okunanwa kuhe li paveta novanailonga tava dopa okuyandja oshimaliwa osho shi na okuyandjwa ngee omunailonga ta ehama unene.
Hedimbi natango okwa ti oministeli ihai ende neengeshefa adishe. Ashike , ohai ningi omatalelo keengeshefa da yooloka.
Okwa ti oministeli ohai tula po omafaneko omatalelo moule weemwedi nhatu.
“Eemwedi nhatu da pi, okudja muApiilili fiyo Juni, okwa li twa shoneka okuninga omatalelo eenghalo dovanailonga e fike po1 032.
Ashike otwa ninga ashike eli 867,” Hedimbi ta ti.
Omunawino moipambele yoilonga Hebert Jauch okwa ti ovanailonga vahapu ihava pula eendjabi davo noimaliwa yavo ikwao oyo ve na okumona shaashi ova tila okukanifa oilonga yavo.
Okwa ti ovayandji voilonga vamwe otava twikile nokwaanyena oimaliwa yovanailonga shaashi ovanailonga vahapu ova tila okulopota oinima ei.
“Oumbada ou ouhapu naluhapu ohau imbi ovanailonga va pule ovahona vavo, nande oveta oye va amena.
Ngee ovahona itava lopotwa ngee tava teya oveta ngaha, ile ngee ovanailonga inava kalelwa po nomahangano ovanailonga inee va amena, nena ovahona kave na eshi tava ningwa,” Jauch ta ti.
Okwa ti oshikumungu eshi kashi shii ashike okukala noveta ashike oku i nghonopeka yoo.
Okwa ti omwaalu ou wa didilikwa otashi dulika okapambu ashike kashona koupyakadi.
“Ondi na oumbada kutya eshi otashi dulika ashike okapambu kashona, otashi dulika natango pu na ovahona vahapu nomahangano itaa yandje omauwa aa noimaliwa oyo inai monika natango.”
Ehololo ole ya konima okomitiye yopaliamente i na sha noilonga nomakwatafano oikwafaabulika omwedi wa dja ko ya didilika kutya eefitola dihapu da kula mOhangwena itadi liufa keeveta pefimbo lomatalelepo omatonatelo.
Pefimbo olo, okomitiye oya mona kutya eefitola dihapu okwa li ta di teya oveta yoilonga, mwa kwatelwa nomilandu dokufuta ovanailonga oshimaliwa shi fike poN$18 movili ngee oshishona.
Omupedu hamushangandjai wehangano lovanailonga ledina Namibia Food and Allied Workers Union (Nafau), Absalom Willem, okwa popya kutya ovayandji voilonga nava fute oimaliwa yovanailonga oyo ve na.
“Ngee oministeli otai ti ovayandji voilonga nava fute oimaliwa yovanailonga, ohatu i yambidida,” osho a ti ngaho. Elvis Lizazi wongudu yoIPC okwa ti ovanailonga ova pumbwa okupewa oimaliwa yavo.
Lizazi okwa ti oimaliwa ei ya monika otai etifa omukumo, unene ngaa kovanailonga ovo va kala va teelela okufutwa.
Okwa ti ovayandji voilonga ovo tava twikile nokukala itava yandje oimaliwa yovanailonga nava ka tukilwe onghatu yopaveta.
“Omahangano oo taa ningi oinima ya tya ngaho, ondi udite kutya oveta nai va katukila onghatu.
Ngee opu na omilandu dopaveta, nadi tulwe moilonga opo omahangano e lihonge kutya Namibia ke shii ashike onhele omo to dulu okuuya ndee to ningi eshi wa hala okuningila ovanailonga ndee to kala ino landulwa,” osho a ti ngaho.
