Ovanafaalama, ovakalimo ova hala okufutwashihapu ngee va ningilwa ominyonena koifitukuti

Ovanafalama vokonooli ovo ve na eehambo di li popepi nonhele yoinamwenyo yedina Etosha National Park moshitopolwahoololo shaShikoto ova ti oshimaliwa osho taku tiwa osho tashi kala hashi futwa ovo va ningilwa ominyonena koifitukuti inashi wana.

Omwaalu oo otau kala tau futwa ovanafaalama ovo va lemanekwa, va dipawa ile oimeno yavo ya teyaulwa po nokukanifa oimuna yavo ya dipawa koifitukuti. Ominista yomidingonoko, omakuti nomatalelepo Pohamba Shifeta okwa li a yandja ewedelo loifuta oyo tai pulwa i kale hai yandjwa ngee oifitukuti ya ningila ovanhu ominyonena koKabinete. Konima yomatalululo, okwa li kwa tokolwa kutya oifuta ei otai i moilonga okudja mefiku lotete laSeptemba.

Mokati koifuta ei ya talululwa omwa kwatelwa oipumbiwa i na sha nomafudiko. Eshi kwa li ta popi noThe Namibian Omaandaxa, Elia Eliuda, oo e na ohambo kOmutsegwonime moshitopolwahoololo shaShikoto, okwa ti oifuta yongobe ipe yoshimaliwa shi fike poN$5 000 keshe mongobe oishona nai.

“Omedi oi na ondilo okulanda ndee okwiikanifa oku li ekanifo lakula neenghono. Omwaalu ou itau dulu okulanda imwe. Ngee onda kanifa ongobe i fimba, ngaho onda kanifa eengobe mbali ndee nandi mone ashike omwaalu u fike opo,” Osho a ti ngaho. Eliuda okwa ti oha landifa outana komwaalu u fike opo, ta pula kutya ngeno omwaalu nau ninge ngaa nande oN$8 000 keshe moshimuna.

“Omwaalu oo otau dulu ashike okulanda omiti deengobe dange. Ohatu kanifa oimuna oku keshe efiku. Ohatu ifana ovanambelewa okudja koministili yomidingonoko, ashike ohave ku hadekifa ashike ofooloma yofuto ndee kai na eshi hai eta po,” Osho a ti ngaho.

Omunafaalama umwe, Moses Amukoto, oo e na ohambo koshitopolwa hashi ifanwa Ekangonde popepi nEtosha National Park, okwa ti ofuto inai wana, ashike oi dulife puhe na sha.

“Ondado nai kale nee nande oi fike pamwe pwaayo hai landifwa oimuna oyo. Kapu na nande opamwe mounyuni ongobe i na oshimaliwa shi fike poN$5 000,” Osho a ti ngaho.

Amukoto okwa ti ofuto luhapu ihai ya diva. “Ile ihava futu nandenande, nande nee ove ya po neendado edi dipe. Ohava futu oolyelye?

Efimbo limwe ovanambelewa ovo ihave ya po naa po pa ningilwa oshiningwanima, ashike ohava pula ashike u va tumine omafano,” Osho a ti ngaho.
Amukoto okwa ti okwa kanifa ongobe, odi imwe noondongi vavali ndee ina futwa nandenande.

“Ongobe nai futwe nande oshimaliwa shi fike poN$10 000. Okufuta nge eyovi mohecta imwe omashendjo ongaho. Oshishona neenghono,” Osho a ti ngaho.

Omupopiliko welelo lopamufyuululwakalo laNdonga Frans Enkali Omaandaxa okwa ti oifuta oyo ipe oi dulife oshali. “Oshimaliwa kashi na fiku shi wane, ashike epangelo otali kendabala ngaa hewa okushakeneka ovanhu ondjilakati. Onda itavela kutya epangelo oli na oshinakuwanifa shoinima ya etwa koushitwe,” Osho a ti ngaho. Enkali okwa pula ovakalimo opo vaamene oimuna yavo koifitukuti pakunghonopaleka eedalate davo.

“Natango, natu lopoteni oiningwanima yoifitukuti pefimbo komalelo e li mondjila opo oinamwenyo ei i shunifwe opo ya pumbwa okukala,” Osho a ti ngaho.

Oifuta ipe otai ti,omunhu oo a lemanekwa koshifitukuti ota ka futwa oshimaliwa shi fike poN$100 000, omwaalu ou owa dja poN$50 000.

Omunafaalama a kanifa ongobe ota ka futwa oN$5 000 keshe moshimuna, okudja poN$3 000. Oshikombo, omunafaalama ota ka futwa oN$800, okudja poN$700, omanga tava ka futwa oN$1 500 monghambe, okudja poN$800.

Mondongi, omunafaalama ota ka futwa oN$1 000, okudja poN$500, omanga omunhu ta ka futwa oN$1 000 ngee a kanifa oshingulu.

Omunhu a monifwa oshiponga ashike ina kanifa oshilyo sholutu shaye shimwe ota ka futwa oN$15 000, okudja poN$10 000 oyo kwa li hai yandjwa nale, omanga ngee okwa kanifa oshilyo sholutu shimwe okwa li oifuta ya wedelwa okudja poN$30 000 fiyo opoN$40 000.