Ovalihongi ovo va teelela okamaliwa kavo okudja kehangano olo hali va futile moshilongo otava ka mona okamaliwa kavo oko inaka yandjwa manga omwedi inau fya.
Eshi osha popiwa momukanda wokoikundaneki wa shangwa kOmbelewa yOmuprima Minista Etitatu, sha landula etalelepo laye inali shiivifwa kehangano oko.
Omukanda owa ti, omuprima minista okwa li a talela po ehangano inashi shiivifwa opo a ka talele eyokomesho lokuyandja oimaliwa yovalihongi nokukonakona omilandu odo da tulwa moilonga kuungaungwe noimaliwa yovalihongi oyo inai yandjwa eemwedi dihapu.
Pefimbo letalelepo, omukulunhuwiliki wehangano eli Eveline Anghuwo okwa lombwela Ngurare kutya ehangano ohali manifa eefuto dovalihongi ve li 1 615 keshe mefiku opo li kwashilipaleke kutya pexulilo lomwedi keshe umwe okwa mona okashona kaye.
Anghuwo okwa ti ovalihongi tava twikile otava ka mona oimaliwa yavo aishe ya kwatela mo Apiilili fiyo oJuli, i fike poN$9 600.
Okwa ti otaku ka fimanekwa tete okuyandja oimaliwa yomondjato opo ovalihongi va dule okuliyambidida.
Okwa weda po kutya oku na elineekelo kutya ehangano oli na oimaliwa tai wanene ovalihongi aveshe tava twikile va dule okumona oimaliwa yavo moule wefimbo eli.
Anghuwo natango okwa ti oimaliwa yovalihongi ve li modula yotete novalihongi vape otai ka yandjwa ashike ngee oiputudilo ya yandje omikanda da pumbiwa di na ouyelele wovalihongi ngaashi omilandu dehangano tadi pula.
Omukanda wokoikundaneki owa ti, Ngurare okwa popya kutya epangelo natango ole litula mo mokukwashilipaleka kutya ovalihongi ova mona omayambidido opashimaliwa oo va pumbwa opo va dule okutwikila nelihongo lavo puhe na oupyakadi wa sha.
Okwa yeleka kutya omilandu doilonga inadi kala etomeno lokuha yandja oimaliwa yovanhu pefimbo ndee ta pula ovanambelewa vehangano va twikile nokweendelela ngaashi tava ningi paife opo keshe omulihongi a mone okashona kaye.
Ombelewa yOmuprima minista oya ti etalelepo eli oli li ombinga yeenghendabala depangelo dokutalela eyandjo lomayakulo nokukwashilipaleka kutya omahangano epangelo otaa nyamukula pefimbo keemumbwe doshiwana.
Okwa weda ko vali kutya ovalihongi noiputudilo yehongo lopombada oya kala ya teelela sha wana ehangano eli li pitife oimaliwa ei manga omwedi inau fya ngaashi la udaneka.
