Ovaleli vodoolopa yaUtapi ove li moshipyu

Kamusela umwe melelodoolopa laUtapi okwa ti oilyo imwe yelelodoolopa oya ile molweedo kOvenduka inali pitikwa nonguduwiliki aishe kakwa li ya shiivifilwa.

Mayola wodoolopa yaUtapi Victorina Neingo, omukulunhuwiliki Ananias Nashilongo nomunashipundi wokomitiye yewiliko Gerson Dumeni vati okwa li va ya koshilando inava lombwela eekamusela dikwao kutya otava ka tala shike.

She likolelela kouyelele womikanda domeni wa shangwa kuNeingo naNashilongo momafiku 07 Apiilili, ongudu ei yovanhu vatatu okwa li i li mOvenduka okudja momafiku 07 fiyo 10 Apiilili.

Ashike nee, omikanda inadi holola kutya ova ka tala shike ile ova ya peni lelalela.

She likolelela komulandu woimaliwa yokulikwafa keshe efiku ngee ovanhu ava va ya molweendo meni loshilongo, keshe umwe womuvo okwa mona oshimaliwa shi fike poN$6 440 ile oN$25 700 aveshe kumwe.

Momukanda umwe, Neingo okwa lombwela ovanailonga kombinga yefaulo lomukulunhuwiliki, ta ti: “Shiivifilweni kutya Mr Nashilongo M Ananias, omukulunhuwiliki, ota ka dja po noilonga okudja momafiku 07 fiyo 10 Apiilili 2026.

Ms EN Ekandjo, omuwiliki akula womayambulepo a pamba eliko, ota ka vatela ponhele yaye momukokomoko womafiku oo.”

Kamusela wongudu yoAffirmative Repositioning, Petrus Shiweva okwa ti kutya onguduwiliki aishe oye ya ashike okuuda olweendo eli okupitila komalungula konima ya mona omafano avo a tulikwa kepandja lelelo loshilando komalungula.

“Otwa uda ashike olweendo eli konima twa mona omafano kepandja lelelodoolopa loshilando,” osho a ti ngaho.

Shiweva okwa hala okuuda kutya olyelye a pitika olweendo netomeno kutya oshike kwa li inali kundafanwa nonguduwiliki aishe manga inali ningwa.

“Epulo ole li: Olyelye a pitika olweendo? Okwa li la kundafanwa peni naasho sha eta oshoongalele shomeendelelo?” osho a pula ngaho.

Shiweva okwa weda po kutya oshiningwanima eshi hasho ashike, ta ti kutya oiningwanima ikwao yoludi eli oya ningilwe odula ya dja ko.

“Eshi hasho oshikando shotete. Momafiku 12 Desemba 2025, ova ningile ngaho natango ndee handi shangele minista womayambulepo eedoolopa noitopolwa yokomikunda handi kongo ouyelele, ashike minista ina nyamukula.

Fiyo onaini ohatu kala ashike hatu kwatele komesho ewilikongudu ngaha?” ta pula.

Neingo ina nyamukula nande omapulo oo a tuminwa Etivali, nande okwa li a udaneka a nyamukule.

Dumeni okwa ti oNeingo ashike naNashilongo nosho yo omupopiliko wodoolopa tava dulu okupopya ponhele yewiliko lodoolopa.

Nashilongo naye Etivali ina nyamukula okatumwalaka oko kwa li a tuminwa. Natango, elelodoolopa laVenduka ola koleka omafano oo e li komalungula mu na ongudu oyo kwa li ya kalela po elelodoolopa laUtapi koshoongalele osho kwa li sha tala kokukelela oimbuluma newiliko loipindi yomomalukanda.

“Elelodoolopa oshivike eshi okwa li la tambula ko ongudu yovakalelipo velelodoolopa laUtapi omafiku avali.

Okwa li twa tala nghee Ovenduka hai wilike oipindi yomomalukanda, omatala omangeshefelo, okwoongela oishoshela yovalandifi vomomalukanda nokulongifa oufano mokulwifa oimbuluma,” elelo loshilando osho la ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.