Elelodoolopa lOndangwa ola londwela ovakalimo ve likaleke kokule nokuteyaula omatungo epangelo sha landula onhele yokudinda omeva oyo opo ya tungwa ya ningilwa omunyonena.
Melombwelo la yandjwa Etivali, elelodoolopa ola popya kutya ola didilika kutya onhele yokudinda omeva oya ningilwa ominyonena, mwa kwatelwa odalate yoluumbo nomadidiliko taa londwele oo a tulwa po.
Omupopiliko wOndangwa Petrina Shitalangaho-Mutikisha okwa ti omatungo aa omaliko epangelo a tulwa po a yakule nokwaamena ovanhu mOndangwa.
“Omadidiliko e li ominge nominyonena aa kwatela mo oinima ya ngabekwa ngaashi ‘okukwata eeshi, okuyowa, okulifa, okukupulwa oinima ile okuya mo’,” Shitalangaho-Mutikisha ta ti.
Okwa londwela ovakalimo vaha tete, vaha tonye, vaha kufe ko odalate yoluumbo nokuya meenhele da gabekwa delelodoolopa inava pewa epitikilo.
Ovakalimo natango ova lombwelwa vaha teyaule eepate delolodoolopa, omalamba, eenhele domalihafifo ile keshe ngaa etungo lepangelo, ile va teyaule omatungo elelodoolopa noilongifo.
“Okuteyaula omatungo e li ngaho ohashi piyaaneke oilonga yao nokutwika elelodoolopa omikundu doku a longifa,” osho a ti ngaho.
Shitalangaho-Mutikisha okwa ti elelodoolopa itali ke lididimikila okunyonauna omaliko epangelo notali ka katukila onghatu ovo tava ka ninga oshinima eshi.
Okwa indila ovakalimo va amene omatungo epangelo nokulopota ovo tave a ningile ominyonena kelelodoolopa ile kopolifi.
