Elelodoolopa laVenduka ola twala ovanhu ve dulife po50 komhangu eshi tava anye okutembulwa ponhele opo pafanekwa pa tulwe omatala oshiwana okulandifila koHavana.
Meindilo olo la yandjwa kOmhangu yOpombada paife, elelo otali pula li pewe epitikilo lokukufa po omaumbo e li lwopo50 oo e li ponhele opo keenghono.
Opo kumanifwe opate pomashakeneno eepate koHavana, elelo loshilando ola pumbwa okutembula ovanhu ovo hava landifile ponhele opo.
Elelo ola konga onhele ipe yokulandifila, opo oshiwana shi dule okutwikila neengeshefa dasho.
Ashike nande ongaho, ovakalimo ovo ve li ponhele opo papumbwa okutulwa omatala omalandifilo ape ova ti inava hafela okukufwa po keenghono, shaashi elelo loshilando inali yandja omayakulo, mwa kwatelwa omeva nolusheno, ngaashi la udanekela ovakwashiwana.
“Eendudu ashike da kufwa po. Kapu na olusheno, omeva, oundjuwo nomayakulo aeshe koonono,” Sakaria Namwele ta ti, omukalimo womoHavana.
Eleledoolopa ola ti etembu lomaumbo otali ka pitika ovanhu ovo hava landifile pomashakeneno eendjila aHavana va tembukile ponhele opo tapa di omaumbo, opo i ninge onhele yavo ipe yokulandifila.
Muni okwa ti omaumbo oo a kumwa ketembu eli aa monikila nale opo taa tembulilwa koHavana Extensions Eight no11.
Omupopiliko welelo loshilando Lydia Amutenya okwa lombwela oThe Namibian Olomakaya kutya oshilando osha “tameka” okukonga epitikilo lomhangu lokukufa po omaumbo aa keenghono.
Omupopiliko woOngos Valley Development Abed Erastus, ehangano olo tali longo opoloyeka ei, okwa lombwela oThe Namibian Oshoondaxa kutya “oilonga yokuwedela omashakeneno eendjila moMatshitshi inai pwa natango molwomatomeno oo a yandjwa kelelo loshilando”.
Fransina Kamati (54) okwa ti ota fininikwa a fiye po onhele oyo a kala puyo omido di dulife po17. Okwa ti okwa mona omukanda womhangu oshivike sha dja ko tau mu pula a kale e i fiya po moule womafiku omulongo.
Kamati okwa ti oku na okinda i na ounona ve li o54, novanhu omilongo mbali ve li ponhele opo.
“Ounona vamwe ava otava i mondodo yotete modula tai ya. Otava ningwa ngahelipi aveshe?” Kamati ta pula.
Okwa ti okwa limbililwa eshi muni e va pa omukanda tau pula va dje po ponhele opo nande natango konhele ipe oko tava twalwa kaku na mayakulo a pumbiwa.
Momukanda wa pitifwa muFebuluali, elelo loshilando ola ti ola longekida nale onhele yoshiwana yokulandifila nonhele yokulondekela nokuhelulila eetekisa.
“Omukanda owa ti ovalandifi otava ka landifila komunghulo, opo oilonga i ye komesho puhe na oupyakadi wa sha.
“Ponhele opo ta pu tulwa omatala ape okulandifila opu na omaumbo e li o44 nongeleka,” omukanda tau ti.
Elelo loshilando momukanda ola tambula ko kutya etembu eli otali ende kashona shaashi ovakalimo otava pula va pewe omayakulo a wana po.
