Ngoloneya woshitopolwahoololo shaKunene Marius Sheya okwa ti ohava longifa oshimaliwa shi fike peemiliyona N$6,8 mokuvatela ovanhu ovo hava mono opendjela youkwanaluhepo moshitopolwahoololo ve li 27 505.
Eshi kwa li ta popi pefimbo loshoongalele shoshitopolwahoololo Etitano, Sheya okwa ti oshimaliwa shimwe sha wedwa po shi fike peemiliyona N$11 ohashi longifwa meependjela dovakulupe ve li 8 536 komwedi, omanga eemiliyona di li N$4,5 hadi longifwa meependjela dovanaulema.
“Osystema ei yeependjela ohai amene ovakulupe novanhu ovo tava mono oixuna koluhepo nondjala, eependjela edi ohadi vatele omaumbo oo a hepa noiyemo, ohadi kufa po okuhafikepamwe nohadi kwashilipaleke kutya ovanhu aveshe otava i komesho,” Sheya osho a ti ngaho.
Omivalu oda ti, omaumbo eli 35 002 moshitopolwahoololo shaKunene ohaa mono oikulya yoshikukuta paife ngaha. Omaumbo aa okwa dja momaumbo e li 78 495 ovakalimo moshitopolwahoololo ovo va taalela onghalo idjuu yoikulya inai wana odula ei.
Sheya okwa weda po vali kutya eshi ombelewa yomuprima minista kwa li ya ninga omapekapeko onghalo yomaxupilo moNamibia okudja muMei fiyo omuJuni odula ei, onghalo yondjala okwa li ya teelelika i kale ngaashi i li muOktomba 2024 fiyo omuMarsa 2025.
“Okukelela omawii elunduluko longhalo yomhepo nokwaamenena po omaxupilo, pelesidente Nangolo Mbumba okwa shiivifa onghatu yopaulumomumbwe yoshikukuta okudja momafiku 22 Mei 2024,” Osho a ti ngaho.
Omaumbo paife ohaa mono okakutu koufila keekilohalama 20, ekende lomaadi okulya leemililita 750, ondooxa yoshi yeehalama 400 nosho yo eehalama 750 dosoya mince.
OMATENDULULO OMADU
Ngoloneya natango okwa holola kutya pefimbo eli tali popiwa, oministili younamapya nounaimuna, omeva nomatendululo omadu oya mona ofaalama imwe oyo i li ombinga yofaalama yedina Farm Vaalwater younene weehecta 2 948.
“Eefalama di li omulongo nananho okwa li da yandjwa kepangelo opo di konakonwe nokutendululwa. Ovanhu vavali okudja moshitopolwahoololo shaKunene okwa li va tulululwa koFarm Balesberg yonomola 637 nokoshipambu osho sha xupa ko shoFarm Vaalwater yonomola 283,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
