Oshipangelo shaNgela osha ninga eemwedi nhatu shihe na eekoondoma, omumbwe oyo ovanambelewa voundjolowele tava ti oya kuma omayakulo omilele da amenwa moshitopolwahoololo shaHangwena.
Okomitiye yopalimente i na sha noipambele yefikopamwe loukashikekookanhu, oundjolowele nonghalonawa yopanghalafano oya didilika oshinima eshi koshipangelo oko Etitatu.
Omunambelewa akula wopaunamiti Lukas Nghaamwa okwa lombwela okomitiye kutya oshipangelo, osho hashi yakula ovanhu ve dulife po100 000, osha taalela vali omukundu womayakulo ounona vomido dopokati noundjolowele wovalumenhu shaashi kave na onhele ya nuninwa omayakulo a tya ngaha.
Okwa ti oshipamgelo oshi na omumbwe yeekoondoma.
“Oshipangelo oshi na yo vali omumbwe yeekoondoma oule weemwedi nhatu paife nonhele yomayakulo ounona vomido dopokati novalumenhu,” Nghaamwa ta ti
She likolelela kokomitiye, oshipangelo oshi na yo omumbwe yomiti da fimana, mwa kwatelwa nomiti dohonde ya londa, osho sha tula eemwenyo dihapu moshiponga. Oya pumbwa epangelo li ninge po sha meendelelo.
Oshipangelo ohashi yandje omayakulo omilele da amenwa, mwa kwatelwa neepolohalama dokuya keefikola, ashike Nghaamwa okwa ti omumbwe yoikwanoipangifo tai twikile otai longifa ovanailonga noudjuu.
“Nande ohatu yandje omayakulo opaunamiti a fimana nokuya keefikola, unene ngaa kombinga yomilele da amenwa, paife ngaha otwa taalela omikundu dihapu,” osho a ti ngaho.
Kakele keekoondoma, Nghaamwa okwa lombwela okomitiye kutya oshipangelo kashi na ovanailonga vopaunamiti va wana, oshi na eeambulansa da kulupa noinima itai longo nawa.
Okwa nyenyeta yo vali kombinga yomiti da fimana dihe po, mwa kwatelwa naado dohonde ya londa.
“Otu na omumbwe ya mana mo yoinima yopaunamiti ya fimana, unene ngaa omiti dohonde ya londa ndee eshi osha pumbwa epangelo li katuke onghatu meendelelo,” Nghaamwa ta ti.
Okomitiye yopaliamente otai kala mOhangwena fiyo onena tai konakona omayakulo nomaufemba omilele da amenwa noHIV nomayakulo omahepeko oukashikekookanhu moipangelo mOhangwena nomoshitopolwahoololo shaMusati.
Okomitiye oya shoneka oundjolowele wounona vomido dopokati, omayakulo omilele da amenwa neenghalo doipangelo neekilinika moitopolwahoololo ei ivali.
Petameko lomwedi ou, New Era okwa lopota kutya oministeli youndjolowele oi na eekoondoma da wanena oshilongo ashishe.
Eshi kwa li ta popi noshifokundaneki, omupedu minista woundjolowele nomayakulo opanghalafano Susan Ndjaleka okwa kwashilipaleka ovanailonga voundjolowele kutya eekoondoma oda tukulilwa nale oipangelo.
“Paife oshinakuwanifa oshovanailonga voundjolowele va kwashilipaleke kutya eekoondoma oda topolelwa oikondo aishe yomondjila opo oshiwana shi dule oku di mona noupu,” osho a ti ngaho.
Ndjaleka okwa indila ovanailonga voundjolowele va kwashilipaleke kutya oshiwana otashi mono eekoondoma noupu, ta ti nande odi kale moipangelo ndee ovo ve di pumbwa itadi va fiki kashi na eshi tashi kwafa.
