OSHIKOND shEvi nOmatulululo otashi ka katukila mbala mboka ya tula evi lyaayehe moondhalate shaali paveta. Oohapu ndhika odha popiwa komupopiliko gwoshikondo shoka, Chrispin Matongela sho a li a pulwa ngele otashi ka landula oshinima shOmupeviminista , Tjekero Tweya ngoka ta lundilwa kutya aniwa okwa tula ehala mevi lyaayehe lyuunene woohektara omayovi 2 936 moshitopolwa sha Kavango molugumbo.Omukwaniilwa gwaaHambukushu nomuwiliki gwelelo lyopahedhi lyaantu mboka, Erwin Mbambo sho a pulwa kombinga yoshinima shika okwa tindi okutya sha a ti ye iha gandja omayamukulo mongodhi.
Ndele Mbambo okwa li a endululwa ku Nampa oshiwike sha yi kutya ehala ndyoka liniwe ku Tweya okwe li pewa pamukalo oku pitila melelo lyaa Hambukushu.Mbambo aniwa okwa ti ehala ndyoka olili pondje yehala lyaayehe , lili kokule konyala ookilometa hamano okuza mpoka pena oshigwana , na okwa ekelehi omipopyo dhawo kutya ehala ndyoka oha li longithwa ongo lyuulithilo wawo. Mbambo aniwa okwa hokololwa ku Nampa kutya ehala ndyoka lya Tweya oli li oshitopolwa sha Shamungwa shegameno lyuushitwe. Pahokololo lya Nampa , ehala ndyoka Tweya aniwa a tula molugumbo olya shangwa moshifo shepangelo ongo Shamungwa conservancy.Omunashipundi shewiliko lyevi moKavango, Thomas Ngoma ina tya kutya ota ya ka kutha onkatu yini ngele osha monika kutya Tweya okwa tula evi molugumbo shaali paveta.Ndele okwa ti ewilikongundu lina sha nevi moshitopolwa shoka ina li taamba natango eindilo okuza ku Mbambo nenge ku Tweya ta indile okupewa ehala li na uunene wu vule oohektara 20. Ngoma okwa ti otashi vulika natango oshinima shoka shi li natango pondondo yewiliko lyopahedhi.
