Ookansela yo Swapo mElelo lya Venduka otaya shuninwa iipundi yawo

OKANGUNDI okaninmatokolo omenene gopapolitika mo Swapo (Swapo Politiburo) oka shunitha mo etokolo lyOkomitiye ompitithi yo Swapo moshitopolwa sa Khomas lyokukutha iipundi Ookansela yane (yo Swapo) mElelo lya Venduka.

Etokolo kutya Ookansela mbaka naya shuninwe iipundi yawo olya ningwa poshigongi sho Swapo Politiburo sha li ko mehuliloshiwike lya zi ko mOvenduka.
Otaku popiwa kutya Omupresidende Hifikupunye Pohamba oye a gandja osheetwapo kutya Meya gwa Venduka, Matheus Shikongo, Bjorn von Finckentsein, Linea Shaetonhodi na Hileni Ilonga, naya shunwe miipundi yawo.
Pohamba okwa li aniwa a popi kutya oshinima shika oshi li ohoni kOpaati nosho wo kOshilandopangelo.
‘Okwa ningwa etokolo kutya Meya Shikongo, Ookansela Linea Shaetonhodi, Bjorn von Finckenstein and Hileni Ilonga, oye na okushinwa iipundi yawo konima sho ya li ye yi kuthwa ina shi ningwa pamulundu kOkokomitiye ompitithi yo Swapo moshitopolwa sha Khomas omasiku omulongo ga piti po,’ oshilyo shimwe sho Swapo Polituburo, osho a lombwele The Namibian mOlyomakaya.
Okwa li wo aniwa kwa tokolwa kutya monakuyiwa, Ookansela mbaka oye na okuya pamwe nomatokolo ngoka taga yambidhidhwa kaantu oyendji mOpaati. Aantu mbaka oya li ya kuthwa iipundi yawo sha zi pokwaauvathana (pokati kOokansela mElelo lya Venduka) ngele okondaraka yOmunambelewa Omukuluntu gwa Venduka, Niilo Taapopi, otayi tulululwa miilonga nenge aawe.
Okondaraka ya Taapopi otayi hulu mu June nuumvo, ihe Ookansela yamwe yo Swapo inaya panda iilonga ye.
Ookalelipo yo Swapo mbaka (mElelo lya Venduka) oya li aniwa ya hala opoosa ndjika yi tseyithwe miikundaneki, opo ku aantu yalwe mboka ye yi hala ya ninge omaindilo.
Konima sho Ookansela ndhika dho Swapo dha kuthwa miilonga, Amushanga-Ndjayi gwo Swapo, Pendukeni Iivula-Ithana okwa li a popi kutya shoka sha ningwa kOkomitiye yo Swapo mu Khomas.
Osha puka molwashoka ina ku landulwa omilandi dhOpaati.