Oshipangelo shaNandjokwe ohashi ungaunga noningwanima yomakapi a teka i li lwopo91 komwedi. Eshi osha kwatela mo omakapi a dja ponhele nomalemano a mana mo a pumbwa omatando.
Ouyelele ou okwa li wa hololwa Etitatu eshi oshipangelo sha mona eshina lokuminikila longushu yeemiliona N$4 okudja kehangano lokuungaunga noiponga yomeendjila ledina Motor Vehicle Accident (MVA) Fund opo shi dule okuxwepopeka omayakulo oipambele yomakipa.
Oshilyo shonguduwiliki yoMVA Fund, Akutu Munyika, okwa ti omwaalu woiningwanima ei otau holola omumbwe ya mana mo yomayakulo a nuka po koshipangelo oko.
“Onda lombwelwa kutya keshe omwedi oshipangelo ohashi ungaunga noiningwanima yovanhu va teka i fike po91, ya kwatela mo omakipa a teka netando lomakipa a dja ponhele,” Munyika ta ti.
Munyika okwa ti omumbwe yomayakulo a pumba otai twikile nokuya pombada, omanga oshikondo sha taalela omatando ahapu, oikwanoipangifo inai wana neemwaka momayakulo opaunamiti opaungoba.
“Nande opu na eyokomesho liwa mokunghonopeka omayakulo opaundjolowele moNamibia, omumbwe yomayakulo opaundjolowele a pumba otai twikile nokuya pombada,” osho a ti ngaho.
Onandjokwe oshipangelo osho hashi tuminwa ovanaudu moshitopolwahoololo shaShikoto.
Eshina lokuminikila olo va pewa otali ka yandja omafano keendokotola pefimbo lomatando nomayakulo akwao opaunamiti.
Munyika okwa ti eshina otali ka yambidida eendokotola di ninge omatando omondjila, okuninga omatokolo opaunamiti nokuxwepopeka omahakulo ovanaudu ovo va teka ile ve na omakipa a dja peenhele.
Ehangano eli natango ola yandja omboola noshishaaxa shomakipa koshipangelo eshi.
“Noikwanopangifo ei, oshipangelo shaNandjokwe paife oshi na omashina opamufika okupanga ovanhu va teka,” omukulunhu woundjolowele moshitopolwahoololo shaShikoto Josua Nghipangelwa ta ti.
Nghipangelwa okwa indila oondokotola, ovapangi novanailonga vakwao vopaundjolowele va hakule ovanaudu nawa ngee oshipangelo otashi dulu okuyandja omayakulo oo va pumbwa.
Okwa ti okuninipika omwaalu wokutumina ovanaudu koipangelo imwe otaku dulu okuxupifa oshimaliwa moshikondo shoundjolowele.
“Mokuninga ngaho, ohatu yambidida oshikondo shoundjolowele nokuninipika omwaalu wokutumina ovanaudu koipangelo ikwao manga epangelo tali dulu okuyandja omayakulo a faafana,” osho a ti ngaho.
Nghipangelwa okwa ti oshikondo shoundjolowele oshi li moupyakadi womwaalu woshiwana tau hapupala, omikifi da yooloka nomumbwe yomayakulo a pumba tai hapupala.
Eyandjo loikwanoipangifo ei oli li ombinga yelongelokumwe la tameka muDesemba 2007 eshi oshikefa noministeli kwa li va shaina eudafanotwokumwe lelongelokumwe.
