Epangelo ola ti kutya omutamanekwa moshipofa shedipayo Abner Mateus okwa li e na omangela yokutomeka Omhangu yaMangestrata mOndangwa nokuninga omangela opo epeko laye li vakwe mo konima eindilo lobooloha la dopa oikando ivali.
Pefimbo loihokolola momhangu Etitatu, omutamaneki wepangelo Yeukai Kangira okwa lombwela omhangu kutya Mateus okwa kendabala yo okuheka omukulupe oo e mu tulila mo oshipofa osho she mu kaleka konima yekumba okudja muNovemba 2022 e shi kufe mo.
Mateus ota tamanekelwa okuunganeka edipayo manga e li modolongo lomutamaneki Justine Shiweda kOndangwa, oo kwa li a yashwa ndee ta tilwa oudiyo momafiku 17 Oktoba odula ya dja ko.
She likolelela kuKangira, Mateus okwa li tete a kwatwa po konima a kengelela omukulupe oshimaliwa shi fike poN$70 000 momudo 2022.
“Owa yandja oilonga yokudipaya Shiweda kovatamanekwa pamwe naave konima omaindilo oye obooloha avali a dopa, konima wa dopa okuheka nakutula mo oshipofa eshi kufe mo, konima omangela yoye yokuxwika po omhangu ei ya dopa nokonima wa dopa okuvakifa mo epeko loye,” Kangira osho a lombwela omutamanekwa ngaho.
Mateus okwe likanyuna omapopyo aa, ta ti kutya ke na mo sha meponokelo lomutamaneki.
“Inandi kwatelwa mo moshikumungu omo. Kandi shi omudipai nokandi na ehalo lokudipaya omunhu,” osho a ti ngaho.
Kangira natango okwa ti kutya Mateus okwa dengela omutamanekwa pamwe naye nondokotola yopaunamiti, Fillemon Nakanduungile, konima yominute eshi Shiweda a yashwa ndee te mu lombwele kombinga yeponokelo.
Mateus okwa nukila pomutenya kutya ina denga ongodi oyo.
Pefimbo loihokolola, Kangira okwa lombwela omutamanekwa kutya Shiweda okwa kanifa omwenyo waye nokwa fudikwa nale.
“Omwenyo waye nau tulumukwe nombili, omufimanekwa,” Mateus a nyamukula.
Ta twikile nokupula Mateus, Kangira okwa pula kutya Omukriste a tya ngahelipi ta unganeke oshimbuluma shi li ngaho.
Okwa weda po kutya Shiweda okwa li ashike ta wanifa po oshinakuwanifa shaye ongomutamaneki pakuvatela okukufa ovafufi ngaashi Mateus mokati koshiwana.
Mateus okwa itavela kutya eponokelo laShiweda okwa li “li nyanyalifa” ndee ta ti ovo ve shi ninga ova nyika oshiponga moshiwana.
“Owa yandja oilonga kovatamanekwa pamwe naave va kwashilipaleke kutya Justine ine ya ndee ta fikama momhangu omu paku mu dipaya. Osho handi ku lombwele ngaho,” Kangira ta ti.
Ashike nee, Mateus okwa twikila nokulikanyuna kutya ina kufa nande ombinga moshiningwanima eshi shedipayo.
