Okaana (14) okwa li vati ka kwatwa inashi yuka komushing woteekisa mOvenduka Omaandaxa omutenya.
Omupopiliko wopolifi wopashiwana omupedu komisina Kauna Shikwambi okwa ti oshiningwanima osha ningwa pokati kotundi 13h00 no15H00, eshi vati okakadona ka kufwa pofikola koteekisa moKhomasdal.
“Oye auke a li mo omutwaalelwa mosheendifo nokwa li ta twalwa koKatutura,” Shikwambi osho a ti ngaho.
Mondjila, omushingi vati okwa pula okakadona eedula dako nongee oke na omumati.
Eshi ka ti kake na sha, omufeekelwa vati okwa tameka oku ka kwataakwata inashi yuka.
Konima eshi ka fika, vati okwe mu pa onomola yaye yongodi ndee ta ti ne mu dengele konima yaefimbo.
“Eshi okakadona ka ya membo, okwa li ta kwena ndee ta lombwele meme waye osho sha ningwa po.
Meme waye okwa dengela omushingi woteekisa, ndee vati te ya keumbo, oko kwa li a ningilwa omahepeko kovakwashiwana,” Shikwambi osho a ti ngaho.
Oshibofa shomahepeko osha patululwa nomufeekelwa okwa li a mangwa po.
Konima okwa li a twalwa koshipangelo.
Opolifi otai pula oshiwana, unene ngaa ounona novadali, va kale va tonata nokutala nawa ngee tava longifa eelefa.
