Omulumentu gwomimvo 20 okwa mana oondjenda ongulohi yOsoondaha mOswakopo sho taku hokololwa a tsuwa nombele pethimbo kwa li a ka shinga pondingosho tayi adhika molukanda lwaMondesa.
Pauyelele wopolisi, oshiningwanima shoka osha ningilwa pondingosho tayi adhika mepandaanda lyedhina Waterberg mondolopa ndjoka yokomunkulofuta.
Nakusa okwa hololwa kutya oye Stephanus Ignatius James, notaku hokololwa a tsuwa nombele konima yoontamanana ndhoka kwa li dha tukuka pondingosho.
Oonkambadhala dhoku mu fala koshipangelo shEpangelo shaSwakopo okwa li dha ningwa, hoka ndohotola e mu konakona nokumona kutya okuna oshilalo shombele metundji lyokolulyo.
Okwa kolekwa a hulitha mbala sho a thiki moshipangelo. Aapambele ye oya tseyithilwa nale onkundana yoluhodhi.
Omupopiliko gwopolisi yoshitopolwa shErongo, Hilma Shomongula okwa koleke oshiningwanima shoka nokwa gwedhapo kutya omufekelwa okwa tulwa nale miipandeko.
“Opolisi oya tula miipandeko omufekelwa omulumentu gwomimvo 22 mekwatathano noshiningwanima shoka.
Omakonakono gopolisi ogeli metifa,” osho Shomongula a popi ngaaka.
Omufekelwa ota holoka mOmpangu yaMangestrata gwaSwakopo nena, ta tamanekelwa oshipotha shedhipago.
Opolisi inayi tseyitha osheetithi shoontamanana ndhoka dha hulile meso.
Omakonakono gopolisi moshinima shoka otaga pula komeho.
Pokati mpoka, inspekta omukuluntu moshikondo shelongo gwoshitopolwa shaMusati okwa tulwa miipandeko ta tamanekelwa oshipotha shedhipago lyaashi lyoshiningilawina.
Komanda gwopolisi yoshitopolwa shaMusati, Ismael Basson okwa koleke oshiningwanima shoka mOmaandaha.
Basson okwa popi kutya omunambelewa ngoka otaku hokololwa a pumu omuntu ongulohi yOlyomakaya mopate yopokati kaTsandi nOutapi.
“Okwa patululilwa oshipotha shedhipago lyaashi lyoshiningilawina osho wo okuhinga e li kohi yondhungo.
Nakuninga oshihakanwa okwa mana oondjenda,” osho Basson a popi ngaaka.
Omufekelwa okwa tegelelwa a holoke mOmpangu yaMangestrata gwOutapi.
Pokati mpoka, otaku hokololwa ohanona ye ekelwahi momudhingoloko gwaMbaye mOlyomakaya ethimbo lyomutenya, sha ningilwa molukanda lwaNarraville.
Pauyelele wopolisi ohanona ndjoka oya adhika ya hulitha noyi li moplastika onduudhe ye ekelwahi molugumbo lwegumbo lyontumba molukanda lwa tumbulwa metetekelo.
Olopota yopolisi oya popi kutya mwene gwegumbo (omukiintu) okwi itsu moplastika ndjoka lwopotundi 15h30 pethimbo kwa li ti ilongekidha okwoopaleka olugumbo lwe.
“Okwa mono oplastika onduudhe tayi limbilike yi li mokoona yolugumbo. Okwe yi kutha po nokwa mono kutya omuna omudhimba gwokanona.
Otaku fekelwa kutya omufekelwa keeshiwike okwa pulumutha okanona nokwe ka tula mbala moplastika nokuyeekelahi molugumbo,”osho omupopiliko gwopolisi moshilongo, omupevikomufala Kauna Shikwambi a popi ngaaka.
Omudhimba gwohanona ogwa falwa kokila yopolisi yaMbaye nomakonakono gopolisi otaga pula komeho.
Kapuna ngoka a tulwa miipandeko sigo oompaka.
