Ongulohi yomasiku 22 Auguste inashi enda nawa momudhingoloko gwaNdama moRundu sho omwenyo gwomulumentu gumwe gwa kana sho taku hoololwa a dhipagwa komuniilonga pamwe naye ngoka wo nokuli anuwa ohondakadhona ye.
Omukuluntu-konakoni gwiimbuluma moshitopolwa shaKavango Uuzilo, omupevikomufala Moses Simaho mEtine okwa popi kutya omufekelwa, Antonio Ngeve (29), otaku hokololwa a tsu nokudhipaga Paulu Katombera (23) sho e mu tsu.
Otaku hokololwa e mu tsu mothingo nekende lya tatuka, sha ningilwa pehala mpoka kwa li haya zi, po opo wo kwa li haya longele mositola yAachina, osho onzonkundaneki ya pamba Katombera ya popi ngaaka.
Aaholathani mboka otaku hokololwa ya kala mekwatathano lyopaihole ethimbo nuule.
Simaho okwa popi kutya Katombera okwa mana oondjenda mondjila yokufalwa koshipangelo shepangelo shaRundu.
“Etompelo lye etitha omufekelwa a hindwe nokudhengwa nenkawa inali tseyika,”osho a popi ngaaka.
Ngeve okwa tulwa nale miipandeko nokwa li a holoka mOmpangu yaMangestrata gwaRundu mEtiyali lya zi ko.
Okwa tindilwa oboloha nokwa kalekwa mongali sigo omomasiku 1 Desemba sho taka holoka natango mompangu, omakonakono gopolisi otaga tsikile.
Aaholathani mboka oya tseyika nawa kuuvidio mboka haya tula komalungula ye li pamwe nonande opolisi inayi koleka kutya ekwatathano lyawo lyopaihole olya li ngiini.
