Oministeli youndjolowele nOmayakulo opanghalafano otai konakona oshiningwanima shimwe vali shomahepeko opalutu sha kwatela mo omupangi kOutjo mexuliloshivike, sha landula shikwao sha faafana sha ningwa mOkahandja omwedi wa dja ko.
Moshiningwanima shaxuuninwa, okavidio taka endaenda nomalungu otaka ulike omupangi moshipangelo shepangelo kOutjo ta tanguna natate womunaudu.
Tate womunaudu, Dankeni Tjilongo, okwa ti eenamanana vati oda tameka eshi a pula kutya omolwashike omukweyo tau ende kashona manga kwa li e li moshipangelo nomonamati Olomakaya.
Tjilongo okwa ti okwa kala a teelela momukweyo oule weevili di dulife puhamano ina yakulwa manga ovapangi vatatu kwa li ve li omutumba.
“Kakwa li nokuli mu hadi. Onda fikama ndi ka pule ngee kapu na ovapangi va wana ile ngee opu na oupyakadi shaashi omayakulo okwa li taa ende kashona,” osho a lombwela oThe Namibian ngaho.
Omupangi umwe, Molelie Geiseb, vati okwa nyamukula momukalo “uhe fi uwa”.
Geiseb vati okwa nyamukula ta ti: “Ngee owa endelela, ila nomupangi woye e ku pange.”
“Onde mu lombwela kutya osha puka okunyamukula nge ngaho,” Tjilongo ta ti.
Vati okwa lombwela Geiseb kutya oha futu oteekisa oyo hai mu futu nongee ke na enyamukulo liwa, okwa li ashike a pumbwa okumwena.
Tjilongo vati okwa pula Geiseb kutya ngeno okwa li pu na omunaudu ta fi, ngeno natango osho ngaa a nyamukula ngaho.
Tjilongo okwa ti kutya okwa ka dja omupangi womukainhu ndee naye ta waimine eenangu, ndee ta ti ngeno okwa li pu na omunhu ta fi, natango ngeno ovanadu ove na ashike okuteelela shaashi ovapangi kave lile po okunukauka.
Mokavidio, omupangi ota ti Tjilongo oku li koshi yodungo.
Tjilongo okwa ti omupangi umwe womulumenhu okwa fikama ndee te mu lombwele a ye, ta ti ota kateke oilonga nokumana po efimbo.
Omupangi oo vati okwe mu undulila kokambete kovanaudu.
“Opo nee nda dilaadila kutya onda pumbwa okulipopila.
Onda kufa mo ongodi yange ndee handi kwata okavidio shaashi okwa li ta kumu nge.
Okwa undula nge, ta kufa nge ongodi yange ndee ta xulifa okavidio. Lao linene ongodi okwa li ya pata, ina dulu oku ka dima mo,” Tjilongo ta ti.
Omupangi umwe womukainhu okwa tameka okukwata okavidio, ta lundile nge kutya onda kolwa, osho a ti ngaho.
“Kakwa li nda kolwa. Onda twala ashike omonamati wange koshipangelo,” osho a ti ngaho.
Omupangi vati okwa ifana omunambelewa wokwaamena omaliko, manga Tjilongo a ifana ohondakadona yaye i uye i kale nokaana opo a dule okufiya po onhele.
Omupopiliko woministeli Walters Kamaya okwa ti oministeli oya unda oiningwanima aishe ei, shokOkahandja nOutjo nomakonakono ee li metifa.
Hamushangandjai wehangano lovapangi moNamibia Junias Shilunga Omaandaxa okwa ti ita ti ko sha koshikumungu eshi shaashi otashi konakonwa manga.
Eshi a pulwa a tye sha, Geiseb okwa anya okutya sha, ta ti oThe Namibian nai yukife omapulo ayo komukulunhuwiliki woshipangelo.
“Itandi dulu okupopya ponhele yoshipangelo kombinga yoshiningwanima osho sha ningwa po,” osho a ti ngaho.
