Ombelewa yangoloneya mOhangwena oya shiivifa kutya ovanangeshefa otava ka shivwa va twale omaindilo avo eepoloyeka.
Etumwalaka eli okwa li la yandjwa kungoloneya wOhangwena Kadiva Hamutumwa pefimbo leenghundafana di na sha neengeshefa neyambukepo loshitopolwa da ningwa kEenhana Etivali.
“Onakwiiwa yeliko lOhangwena oye likolelela kelitulemo letu lopamuhanga lokuninga eengeshefa moshitopolwahoololo shetu,” Hamutumwa ta ti.
Okwa ti omapekapeko opangeshefa aa mona eemhito moikondo ngaashi shounamapya nounaimuna, shokunduluka oinima, shounghulungu, shoundjolowele, shomatalelepo noshokuteleka, manga yo taku yambididwa eengeshefa moikondo ya fimana mwa kwatelwa omeva, oikwanghono, ewiliko lomitwalo nomaumbo.
“Elalakano letu okukwashilipaleka kutya eengeshefa domoshilongo itadi kala ashike tadi tale eyambukepo ashike otadi kufa ombinga, tadi dutu oinima nokumona eemhito dekufombinga moshitopolwahoololo,” osho a ti ngaho.
Ngoloneya okwa ti oshinima eshi otashi ka tameka momafiku 11 Auguste fiyo 23 Septemba 2026, opo kupitikwe ovanangeshefa va yandje omaindilo avo eepoloyeka moikondo ya fimana moshitopolwahoololo.
Omukulunhuwiliki wehangano ledina Monasa Advisory & Associates, Jason Kasuto, okwa ti ehangano ola ulikwa li yandje omayele opashimaliwa nopangeshefa mokutunga po omulandu wopangeshefa moshitopolwahoololo.
“Eshi etulomoilonga tali pula komesho, Monasa ota twikile nokuyambidida ombelewa yangoloneya nokomitiye yoipambele yongeshefa moshitopolwahoololo, nomalongekido eepoloyeka, omilandu dopangeshefa nokukwatela komesho ongeshefa kukwashilipalekwe kutya eepoloyeka ode shi pondola,” Kasuto ta ti.
Okwa weda po kutya Monasa ota ka longela pamwe nOmbaanga yOmayambulepo yaNamibia mokukonga oshimaliwa kepangelo novanangeshefa moshikondo shopaumwene.
