Omauliko gopaipindi gondolopa yaMuthiya goshikando oshititatu oga mono ekwatho lyoshimaliwa sha kola mOlyomakaya konima sho aanangeshefa naaniipambuliko ya gandja oshimaliwa shooN$626 026 pethimbo lyuulalelo wowina wegongelo lyoshimaliwa.
Oshimaliwa shoka otashi ka longithwa miinyangadhalwa yokuthikameka po omauliko giipindi, ngoka kwa thanekwa taga ka kala ko muKotoba numvo pomatala omape gomondolopa yaMuthiya.
Pethimbo lyuulalelo mboka wegongelo lyoshimaliwa, omukuluntuwiliki gwokomisi yokuninga omathaneko moshilongo yo-National Planning Commission, Kaire Mbuende okwa popi kutya oshituthi shegongelo lyoshimaliwa otashi ulike uukumwe meitulomo lyokunkondopeka omapendulopo gopaliko osho wo okweetapo oompito dhaanangeshefa yopevi mondolopa.
Mbuende okwa popi kutya ehuku lyomumvo nguka lyomauliko giipindi gaMuthiya otali ulike esimano lyokuhwepopeka oongeshefa okupitila mokwiitula mo momapendulopo gontseyo, mokutotapo iinima, iikwaniipangitho osho wo okugandja omudhingoloko gwomilandu.
Mbuende okwa popi kutya okugwedha ongushu miilandithomwa onkene shi li oshinima sha simana opo ku shilipalekwe kutya iilandithomwa oya longwa megumbo peha lyokukala taku tuminwa iinima pondje yoshilongo yi ka longwe yo tayi galuka moshilongo kondilo.
Okwa popi kutya okulonga iinima megumbo okuza pekota sigo ya yi momalandithilo otashi gandja ongushu pamahupilo moshigwana nohashi gandja wo oompito dhiilonga.
“Ondolopa yaMuthiya okukala yi li mosheelo shokuya kiitopolwa yokonooli yoshilongo, osha gandja ompito ya simana kaalandithi, koshikondo shomatalelopo osho wo koongeshefa dhokugandja omayakulo gokwalukehe, ashike oongele epangelo, iikondo yopaumwene naakwashigwana taya longele kumwe ,”osho a popi ngaaka.
Omunangeshefa Shafa Kanime okwa popile enkondopeko lyokulongela pamwe, nokwiindile aanangeshefa moshitopolwa ya longithe oompito dhi li mondolopa yawo yaMuthiya yo ya kwathele mokuyambula po omahupilo gondolopa.
Kanime okwa popi kutya ondolopa oyi na ompito ombwanawa yokuninga omudhingoloko gwa dhenga mbanda gwaatalelipo osho wo okukala ehala lya simana lyomangeshefelo, unene tuu ngele aanangeshefa oya tsikile nokuyambidhidha iipindi osho wo iinyangadhalwa yilwe mondolopa mbyoka ya pamba omahupilo ngoka taga kala muuwanawa wondolopa osho wo oshitopolwa koonono shaShikoto.
Okwa popi wo kombinga yesimano lyokulongitha evi ndyoka ewanawa nuunamapya momudhingoloko gwaMuthiya, nokwiindile li dhigininwe mokulonga omapya, nokwa popi kutya oshikondo shuunamapya nuuniimuna osho ongudhi yomapendulopo geliko notashi vulu okweeta po oompito dhopangeshefa dha gwedhwapo kaakalimo.
Omauliko gopaipndi gondolopa yaMuthiya ngoka haga ningwa omumvo kehe otaga lalakanene okuhumitha komeho aanangeshefa yomoshitopolwa, okunana omapungulilo osho wo okuhwepopeka omapendulopo gopaliko pandondo yopashitopolwa.
–Nampa
