Moshikondo shiihauto moshilongo omuna omananathano kombinga yepangelo ndyoka lya tseyitha kutya olya thaneka okukutha po oondjindikila dhokweeta iihauto moshilongo mbyoka yina oomvula dha konda po12.
Ombinga yimwe otayi popi kutya etokolo ndyoka otali ka eta iihauto yina ombiliha moshilongo tayi vulika unene tuu kwaamboka yiiyemo iishona, omanga ombinga onkwawo oyi li ompinge netokolo ndyoka molwashoka oye wete iihauto mbyoka tayi keeta uupyakadhi koonaku yi landa.
Omwedhi nguka epangelo olya popi kutya olya thaneka okukutha po oondjindikila dhokweeta iihauto moshilongo mbyoka yina omimvo dha konda po12.
Etokolo ndyoka olya tseyithwa omasiku ga zi ko, kuminista gwiimaliwa Ericah Shafudah, pethimbo lyoshigongi naanangeshefa aashona mboka haya mbestele iinima okuza pondje yoshilongo ya tseyika nawa nedhina ‘Order With Me’.
Shafudah okwa popi kutya oondjindikila okwa li dha tulwa po omimvo dha zi ko, omolwomanyenyeto kwa li ga zi koongalashe oonene dhokulanditha iihauto moshilongo ndhoka kwa li tadhi popi okweeta iihauto yomimvo dhonale ondumba moshilongo otashi dhipaga oongeshefa dhawo.
Ashike nando ongaaka, minista okwa popi kutya etokolo lyoondjindikila inali longa sha shomupondo okukandeka iihauto yombiliha yi etwe moshilongo.
“Omulandu ngoka inagu hulithapo nande okweeta iihauto mbyoka moshilongo,” osho a popi ngaaka.
Omukuluntuwiliki gwongalashe yokulanditha iihauto Pupkewitz Motors, Anton Westraadt, okwa popi kutya ekutho po lyoondjindikila dhokweeta iihauto mbyoka moshilongo nali kale nomilandu dhokugamenenapo ookastoma opo kaadhi kiiyadhe muudhigu wiihauto mbyoka.
Westraadt okwa popi kutya ongalashe yawo oya simaneka oonkambadhala dhepangelo okutalulula omilandu opo onkalo yi kale muuwanawa wookastoma osho wo weliko lyoshilongo.
“Eikwato pomutima lyetu kalinasha naanaa nomangeshefelo, ashike olyi li kombinga yokastoma ndjoka tayi longo neitulemo okupungula oshimaliwa shawo nuukeka noku shi longitha mokulanda oshihauto,”osho a popi ngaaka.
“Uuna nee oshihauto shoka sha thiki ndele kashina omatayela gomondjila ano taga opalele onkalo yoopate dhetu, oshihauto shoka kaashina iitenda tayi vulu okulandwa moshilongo ngele sha teka, nenge pwaana aapangeli uuna iihauto ya teka, nena okastoma ndjoka otayi kala muudhigu.
Onkalo ndjoka oyo nee mbwinayi omuntu itoo kala nande wa hala okwiiyadha muyo,”osho a popi ngaaka.
Okwa pula wo ngele iihauto mbyoka hayi zi pondje yoshilongo ngaashi koJapan otayi opalele ngaa onkalo yombepo yaNamibia.
“Opuna omapulo omanene ngele iihauto mbyoka ya za ngaashi koJapan, hoka opate, onkalo yombepo osho wo omahooli ga yooloka kwaangoka getu, otayi opalele ngaa shili momudhingoloko gwaNamibia.”
Westraadt okwa gwedhapo kutya onkalo yombepo yaNamibia, ongushu yomahooli osho wo ontsi oyo yimwe tayi vulu okweeta uudhigu kiihauto mbyoka inaayi longwa ya nuninwa onkalo yaNamibia.
Okwa popi kutya etalululo lyomilandu nali kwatelemo onkalo yiihauto tayi etwa moshilongo, okutala wo kutya iipumbiwa yoshihauto shoka otayi vulu okulandwa moshilongo osho wo oshilanduli kwaamboka taya eta iihauto moshilongo uuna tayi eta uupyakadhi kookastoma.
Westraadt okwa popi kutya omulandu ngoka gu li po gwoondjindikila dhoomvula 12 inagu guma lela nande Pupkewitz Motors pamalandithilo.
“Tse ohatu longo niihauto yolela yongushu, kutya nee iipe nenge oombyoka ya longa nale.
Iihauto yetu ayihe mbyoka yi li momalandithilo ya longa nale ohayi ningilwa omakonakono gomuule omanga inaayi tulwa momalandithilo,”osho a popi ngaaka.
Omulandu ngoka gwoondjindikila dhiihauto iikulu nenge ya longa nale okwa li gwe etwa po mo2022 sho gwa kuthwa pomimvo hetatu nokuundulilwa pomimvo 12.
Ompango ndjoka otayi dhengele kiihauto yoludhi kehe, nonkene itayi pitikilwa moshilongo uuna yi na omimvo dha konda po12 okuza omumvo ya ndulukwa.
Pethimbo oondjindikila ndhoka dha tseyithwa, uuministili wiipindi owa popi kutya oondjindikila ndhoka itadhi dhengele kiihauto yowina ngaashi yoambulansa, yuupangelo, yooTiiVii osho wo yilwe.
Mwene gwongalashe yokulanditha iihauto ya longa nale yedhina HVR Auto, Handie van Rensburg, okwa popi kutya ngele oondjindikila ndhoka odha kuthwa po nena otashi ke eta Aanamibia ya vule okulanda iihauto kombiliha noyongushu.
Van Rensburg, ngoka a kala ta landitha iihauto muule womimvo 10 dha piti, okwa popi kutya iihauto oyindji mbyoka yina omimvo dha konda po12 miilongo ngaashi shaJapan onkene yi li monkalo ombwanawa okulongithwa moNamibia notayi opalele onkalo yombepo moshilongo.
“Ondiwete kutya otashi ka kala etokolo ewanawa kaakunawe ngele epangelo olya katuka onkatu ndjoka,”osho a popi ngaaka.
Van Rensburg okwa popi kutya iihauto oyindji yokoJapan inayi monithwa iihuna konkalo yombepo nenge okweendithwa koopate dhooholondo nonkene shoka ohashi eta yi kale natango yi li monkalo ombwanawa nonande omimvo odha fa dhaya.
“MoJapan omuna iihauto oyindji mbyoka yina omumvo dha konda po12 ashike onkene yi li lela monkalo ombwanawa notayi vulu okulongithwa miilongo ngaashi moNamibia. Ngaaka otatu popi iihauto ngaashi ooToyota RAV4 osho wo oobakki ndhoka dha kwatwa lela nawa,”osho a popi ngaaka.
Okwe ekelehi eikwato pomutima kutya ngele oondjindikila ndhoka odha kuthwa po nena otashi ka eta Namibia a ninge eyana lyiihauto ya kulupa.
