Ovanambelewa vokukelela oukongo uhe li paveta mofaalama mOutjo ongula yOlomakaya okwa li tave lipe mo neeholo novalumenhu vavali ovo tava feekelwa kutya ovakongo vehe li paveta, osho sha eta omutamanekwa umwe a lemanekwe.
She likolelela kopolifi, oshiningwanima osha ningwa potundi 09h00 eshi ovalumenhu vavali, umwe oku na omido o30 omanga mukwao e na o45, vati va ya mofaalama yedina Kifaru ndee tava monikilila po kovanambelewa ovo kwa li tava shiike momafaalama.
Ovatamanekwa vati ovapatulula omundilo va yukifa kovanambelewa, ashike ovanambelewa navo ova ti haluni ihadi ninwa peumba laye, ova shunifa omundilo ndee tava lemaneke omutamanekwa womido o30.
Okwa li a twalwa koshipangelo kOutjo a ka mone omayakulo opaunamiti, omanga omutamanekwa mukwao womido o45 a faduka po.
Opolifi oya ti ondjebo yokuyasha oifitukuti, nomakoto avali eeholo, oipatolona ivali, ombele, ekuva, omboloto noutyeepisha ova hangika opo pa ningilwa oshiningwanima eshi.
Omulumenhu womido o35 oo vati oye kwa li ta shingi osheendifo osho she ya novatamanekwa, naye okwa li a tulwa moipandeko.
Opolifi oya ti okwa li a hangika nosheendifo shoipundi iheyali sha fikama momunghulo wondjila yoD2761 popepi nofaalama.
Ovatamanekwa otava tamanekelwa okulongela kumwe va ye moukongo woifitukuti ya amenwa nokuya mofaalama yovanhu shihe li paveta.
Moshiningwanima shikwao sha yooloka, opolifi otai konakona oshiningwanima sheteyo leumbo nomunyeka konima ovatamanekwa ovalumenhu ve liteyela meumbo moEros mOvenduka Etitano.
Otaku tiwa kutya ovatamanekwa ove liteyela meumbo mepandaanda laKilimanjaro lwopotundi 01h30 Etitano ndee tava mange omukainhu (44) manga inava tameka okuhanda eumbo.
Opolifi oya ti, omukainhu okwa li a kofa eshi ovatamanekwa ve mu pendula, tave mu mange komaoko ndee tave mu lombwele a mwene.
Ovatamanekwa vati ove mu kufa ongodi, tave i patulula ndee tava i momayakulo aye ombaanga opamalungula.
Pefimbo loshiningwanima eshi, oinima yongushu yoshimaliwa shi fike poN$51 000 oya iwa nayo, opolifi tai ti.
Opolifi Oshondaxa oya ti, kapu na nande omunhu a mangwa po noinima ei ya vakwa po kapu na eshi sha monika
Omakonakono opolifi moiningwanima ei otaa twikile.
