Oilyo yEumbo Etivali lOpashiwana oya indila oministeli yoikwafaabulika, oikwamina noikwanghono i kwashilipaleke kutya omahangano oikwamina aa kufa ombinga meyambukepo loshilongo.
Oilyo oya londwela kutya oshilongo otashi twikile okukana manga omauwa okudja meedjo dopaushitwe a yuka ashike komahangano okodje yoshilongo.
Eshi kwa li ta kufa ombinga meemhata domutengenekwafaneko woministeli Etitano, omunapaliamente Adolf Uunona, okwa ti omahangano ahapu oikwamina ohaa kufa eliko moshilongo, omanga ovakwashiwana ve li konima moshilongo.
“Omahangano okondje yoshilongo ohaa ningi oimaliwa okudja meendjo detu ndee tae tu pe oumaliwa vashona, omanga oilongo yavo ya dja ko neenghono tai longifa eedjo detu.
Namibia na fininike omahangano aa a yambule po oshilongo,” osho a ti ngaho.
Uunona okwa indila oministeli i yandje oshinakuwanifa shakula komahangano oikwamina opo a kufe ombinga meepoloyeka domayambulepo dopashiwana.
Omupedu minista wouyuki noipambele yoilonga Inecia Brandt, okwa indila oministeli i ninge omapekapeko keenhele doikwamina, ta ti okufukula oikwamina kuhe li paveta otaku twikile nokukanififa oshilongo oiyemo nomaliko.
“Otu na oiningwanima ihapu yovanhu tava fukula oikwamina ashike oministeli kai shi shii,” Brandt ta ti.
Natango okwa indila ehangano ledina Regional Electricity Distributors (REDs) opo li pule oishoshela i shii okulididimikilwa kovakwashiwana koitopolwa yokoushai.
Oshilyo shopaliamente Nestor Sheimi, okwa londwela kutya eedjo dopaushitwe otadi pu po unene tadi endelele, ta pula eedjo dimwe di fiwe medu, di longifwe monakwiiwa koshiwana shokomongula.
Momudo 2024, epangelo ola shiivifa omafaneko okuxulifa po okulandifa eedjo dopaushitwe kondje yoshilongo inadi wedwa ongushu nelalakano lokuyambula po oshilongo, okuyandja eewino nokutota omahangano okudinda.
Natango, Matheus Nanghama okwa pandula eenghendabala dokuyandja omalusheno koitopolwa yokoushai ashike okwa indila kutya oshiwana osho shi li popepi naa po tapa ende olusheno la yuka komahangano epangelo, shi pewe omalusheno.
