Omupedu prima minista mukulu John Mutorwa okwa pula elelo loshitopolwahoololo shaKavango Ushilo noministili youndjolowele nomayakulo opanghalafano nosho yo oministili yeameno opo di yandje koshiwana olopota yoikulya tai feekelelwa oudiyo komukunda wedina Kayova ngee ya manifwa.
Mutorwa eindilo eli okwe li ninga pefimbo loshoongalele shovakufimbinga Olomakaya, sha landula omafyo ovanhu ve li 20 va xulifa eshi taku feekelwa kutya ova lya oikulya i na oudiyo koshikandjohoololo shaNdiyona pokati komudo 2023 nomudo 2025.
Ovaleli va yooloka vopashitopolwahoololo, mwa kwatelwa ngoloneya woshitopolwahoololo shaKavango Ushilo, komanda wopolifi moshitopolwahoololo, ovaleli vopamufyuululwakalo, ovaleli vopaikandjohoololo nosho yo oshiwana, okwa li va ongala va tambulafane omadilaadilo kutya otaku shonopekwa ngahelipi oiningwanima ei yoikulya i na omaudiyo moshikandjohoololo shaNdiyona.
Ovakwashiwana ava va popya koshoongalele shovakufimbinga ova holola onghumwe ya kula kombinga yekateko loidjemo youdiyo.
Ova itavela kutya oidjemo otai dulu okuyeleka kombinga yoiningwanima yoikulya i na omaudiyo moshikandjohoololo.
Mutorwa muMarsa oduala ya dja ko okwa ti okwa li a shangela koministli yoipambele yomeumbo, omatembu neameno opo i konge omanyamukulo kolabolatoli.
Eshi ya nyamukula, okwa li a lombwerlwa kutya oshikondo shopolifi shomakonakono opaungoba osha mona ashike oilongifo ipe yokukonakona muFebuluali 2024.
Ova ti ovanongononi ove na manga okuya komadeulo noilongifo otai konakonwa manga kutya otai longo ngahelipi. Oidjemo youdiyo otai ka pitifwa ashike ngee omulandu ou wa pu, osho a ti ngaho.
Ovakwashiwana ova pula oministili youndjolowele nosho yo yeameno opo di endelelife epitifo lolopota yoidjemo opo eefamili edi da kumwa di ude ko kutya oshike sha etifa omafyo ovakwapata vavo ndee tadi kongo omukalo wokuxupula.
Dr Mathias Luemba wokoshipangelo shaNyangana okwa fatulula kutya pefimbo loiningwanima, oshipangelo ohashi konakona opo shi mone oupyakadi nokuyakula omunaudu.
Ashike nee, oinima yokukonakonwa oudiyo oyo kwa li ya ongelwa kopolifi okwa li ya tuminwa koSouth Africa okupitila moshikondo shomakonakono opaungoba mOvenduka, shaashi oinima oyo kai na pa tai konakonwa moshilongo.
Oshikondo shomakonakono opaungoba shaVenduka natango osha teelela oidjemo, osho a ti ngaho.
-NAMPA
