Opolifi moshitopolwahoololo shaShana otai indile oshiwana shi yambidide mokukonga ovadali novakwapata vohanana yokaadona oyo kwa li ya hangika ya fiwa mehalandjadja kUupindi mOshakati oshivike sha dja ko.
Ta popi noThe Namibian Etivali, omukulunhu womakonakono oimbuluma kOshana omupedu komisina John Mwatongwe okwa ti ohanana oya hangika popepi nombaa mUupindi, olukanda limwe lomOshakati.
“Okaana natango oke li moshipangelo, ina, xe ile keshe ngaa omukwapata ke shiivike natango.
Okaana mutu oke na omwedi umwe ile kashona,” Mwatongwe ta ti.
Okwa ti okaana oka hangika mehalandjadja popepi nombaa, ashike kashi fi nande meni lombaa.
“Okwa li a hangika pombaa, ashike kashi fi meni.
Ohatu indile oshiwana shi yambidide opolifi noministeli youkakwashikekokanhu mokukonga ovakwapata vokaana aka,” osho a ti ngaho.
Mwatongwe okwa weda po kutya moshiwana otashi dulika mu na omunhu e na ouyelele tau dulu okuvatela opolifi i mone ovakwapata vokaana aka.
“Onda itavela neenghono kutya opu na omunhu e shii kutya okaana okalyelye.
Pamwe ou shii kutya kaume koye, mumwanyokomati ile mumwanyokokadona okwa li e na okaana ndee paife ke ka na vali.
Ohatu indile oshiwana shi tu vatele tu mone ina ile ovadali ile ovakwapata,” osho a ti ngaho.
Okaana natango otaka mono omayakulo opaunamiti manga omakonakono taa twikile.
Oshiningwanima osha landula oshipofa shimwe sha lopotwa petameko lomudo.
muMaalisa, oThe Namibian oya lopota kutya ohanana yomumati oya hangika ya fiwa pongeleka mOmungwelume moshitopolwahoololo shaHangwena.
Opolifi oya indila keshe omunhu e na ouyelele tau dulu okuvatela kumonike ovadali ile ovakwapata vokaana aka a dengele oshitaashi shopolifi shi li popepi.
