Presidente Netumbo Nandi-Ndaitwah okwa holola oluhodi molwefyo lomukondjeli manguluko nomupopili woipambele yoilonga Joseph Shityuwete, oo a xulifa Olomakaya konima ashike eshi a dimbuluka edalo laye lomido 92.
Momukanda wa dja mombelewa yaPresidente, Nandi-Ndaitwah okwa ti efyo laShityuwete ole li kalekelwa shaashi ole ya konima yomafiku ashona eshi kwa dimbulukwa Efiku lOmapendafule.
“Efyo laye, konima ashike yomafiku eshi Namibia a dimbuluka Efiku lOmapendafule momafiku 26 Auguste, otali luluma unene.
Mefiku omo, oshiwana shetu okwa li sha yandja efimano kovalumenhu novakainhu ovo va yandja eemwenyo davo kekondjelo manguluko.
Hailwa Shityuwete naye oumwe womongudu oyo ya kufa ombinga mondjokonona yetu,” osho a ti ngaho.
Shityuwete, omunadolongo mukulu moRobben Island oo a kala ta kondjifa oukoloni, ota dimbulukiwa nawa mondjokonona yoshilongo nomokupopila omaufemba ovanailonga.
Presidente okwa ti nande okwa li a ya modolongo nokumona oixuna, omhepo yaShityuwete inai lunduluka, neitavelo laye lokumangulula Namibia inali kana po.
Konima yekondjelo manguluko, Shityuwete okwa twikila nokuyakula oshiwana okupitila mokushanga nokupopila omaufemba oilonga, ta dana onghandangala ya fimana mokushanga ondjokonona yekondjelo manguluko laNamibia.
Okwa popya kutya nande efyo laye ola idila etukulwa la fimana mondjokonona yoshiwana, eenghedi odo a popila nekondjelo manguluko olo a lwila otali kala alushe nokudimbulukiwa.
-Nampa
