Presidente Netumbo Nandi-Ndaitwah okwa pula Namibia naSouth Africa va lundulule ekwatafano lavo lopaipindi ndee tava tameke okutala unene koikwafaabulika, engushupaleko loinima nokulonga oinima yavo vene opo va tote eemhito doilonga nokuyambula eliko.
Eshi kwa li ta popi poshoongalele sheengeshefa sha li pokati koilongo ei ivali moMidrand, moSouth Africa, Etitano, Nandi-Ndaitwah okwa ti oilongo ei ivali oya panga oukaume wopapolitika ashike paife osha ninga efimbo lokulongifa ekwatafano eli mokuyambula po eliko olo tali etele ovanhu omauwa.
Okwa ti South Africa natango oye kaume akula waNamibia ngee tashi ya koipindi, okulandifa oinima, omashina, oikwamahooli, oinima yopaunamiti noyeendifo, omanga Namibia ha landifa eedjo dopaushitwe, eeshi, oimuna noilikolomwa younamapya nounaimuna kuye.
Ashike nee, presidente okwa ti omukalo woipindi wopaife, omo oinima inai ngulushupalekwa tai landifwa kondje yoshilongo omanga oshilongo tashi lande oinima ya ngushupalekwa, nau lunduluke.
“Opo tu hange eyokomesho neyambukepo leliko lashili, natu lundulukile koikwafaabulika, engushupaleko loinima nokulonga oinima yetu vene,” osho a ti ngaho.
Nandi-Ndaitwah okwa ti Namibia ota yandje eemhito dounamapya nounaimuna, moikwamina, oikwanghono, omahooli noshimoko, eeshi noyeendifo.
Ei imwe yomuyo tai yambididwa ketuliloshikepa laMbaye.
Presidente okwa indila omapangelo a twikile nokukaleka po omilandu tadi popile ovanangeshefa manga yo ta tu eengeshefa omukumo di yambule po oungoba, eewino nokutota eemhito doilonga menenedu.
