OMUPEVI-KULUNTUMINISTA Netumbo Nandi-Ndaitwah okwa tsu omukumo oosikola dhomoNamibia, unene dhokiitopolwa yokomikunda, opo dhi longithe iilongitho yopautekenika.
Nandi-Ndaitwah okwa li ta popi pethimbo ta gandja ookompiyuta, ndhoka FNB Namibia a gandja omagano kosikola yedhina Mwandingi Etuwata Amkongo Primary School, mEtitatu lyoshiwike sha zi ko. Nando osikola oyi li momukunda Iilya moshikandjohololo Okankolo moshitopolwa Oshikoto, ookompiyuta odha gandjelwa moshilandopangelo shaNamibia, Windhoek.
Pahokololo lyomupevi-kuluntuminista, osikola ndjika oya li ya pewa olusheno mo2015.
“Otu shi shi nawa kutya elongo olyo hali thikitha pamwe aantu, onkene otu na okushilipaleka kutya aalongwa yokiitopolwa yokuushayi otaa longitha iilongitho yuutekinolohi ngaashi naanaa mbyoka tayi longithwa moosikola dhomoondoolopa,” Nandi-Ndaitwah ta ti.
Nandi-Ndaitwah oku na wo eineekelo kutya aalongwa otaa ka longitha ookompiyuta ndhoka nawa, notadhi ka longa wo muuwanawa waantu ayehe yomomudhingoloko gwosikola.
