NAMIBIA na South Africa oya koleke omauvathano gatatu gelongelokumwe pethimbo lyetalelopo lyomuperesidende Hifikepunye Pohamba koshilongo hoka oshiwike shika. Pohamba oya kundathana nomuperesidende Jacob Zuma mo Kapa, moka ya talulula eyokomeho ndyoka lya ningwapo kombinga yelongelokumwe pokati kiilongo mbika iyali. Pethimbo lyoonkundathana ndhoka aawiliki mbaka yaali niiyendo yawo oya li ya konene iikondo shiipindi, omapungulo, oonkondo, omalweendo omudhingoloko, uunongononi , uutechnology, elongo, uutalelipo noshowo iipambele yegameno.
Pohamba okwa ti otapa ka ningwa oonkambadhala adhihe opo omauvathano ngaka ga tulwe miilonga. Omauvathano ngaka oga shainwa koominista ngaashi yiikwapondje yiilongo mbika iyali, li nasha nedhikopo lyokakommisi kiilongo mbika iyali hoka ta ka kala noku gongala lumwe omumvo kehe mo Pretoria nomoVenduka. Okakommisi haka ota ka kala kena uukomisi uushona une, kuudiploma, kopamahupilo, onkalathano, egameno nepopilo. Oominista dhiilonga, dhiilongo mbika iyali odha shaina euvathano lyelongelokumwe miitopolwa ngaashi okutunga oondjila, noshowo oku taambathana kwaanawino mu inginia.Oya shaina woo euvathano kombinga yelongelokumwe moshinima shetengeneko lyombepo. Iilonga yoku tengeneka onkalo yombepo ya South Africa oya kwathela nale Namibia mokudheula aanambelewa ye mokutengeneka ombepo. Pohamba okwa ti oonkundathana dhe na Zuma naambelewa yawo odha li oombwanawa na odha eta iiyimati yi li nawa.
