Muni waTjiwarongo okwa tameka okupata omeva meembelewa depangelo neengeshefa ongonghendabala yokwoongela eengunga domayakulo omeva.
Omukulunhuwiliki wodoolopa yaTjiwarongo Mberipura Hifitikeko Etine okwa ti oikonga yokupata omeva oya tamekele Omaandaxa noya shoneka eengeshefa di li lwopo60 nomahangano epangelo modoolopa.
Okwa ti omaumbo oo e na eengunga inaa kwatelwa mo moshikonga eshi manga.
“Paife otwa shoneka ashike eengeshefa di li 60 nomahangano epangelo oo e na eengunga damuni deemwedi mbali da pita, di dulife peemiliona N$9.5,” osho a ti ngaho.
Hifitikeko okwa ti muni ita dulu okupopya moshiwana kutya eeministeli neengeshefa di lipi da kumwa molwomaudafano okuholeka ouyelele oo ve na.
Okwa ti muni okwa kala nokushangela ko omikanda ta pula va fute , ashike inava futa.
“Onghee nee, muni ke na vali nghee ashike ota pate ashike omayakulo meengeshefa nomahangono oo e na eengunga ongomukalo wokwoongela eengunga daye,” osho a ti ngaho.
Omukulunhuwiliki okwa pula ovawiliki vomahangano epangelo a kumwa koshinima eshi va kundafane nombelewa yamuni yokwoongela eengunga opo va fute eengunga davo.
Okwa ti omahangano amwe neengeshefa oda twikila okudopa okufuta oiniwe yado yokomwedi osho tashi nghundipaleke onghalo yamuni yoshimaliwa.
Hifitikeko okwa ti muni ota ka fila ashike onghenda ovo tava ka futa ko etata leengunga davo manga yo tava udaneke oku di futa ko adishe.
Muni oha futu eemiliona di li N$3.5 koNamWater komwedi domeva omodoolopa.
Omukulunhuwiliki okwa holola kutya pexulilo laMei, ovanhu okwa li ve na eengunda damuni di fike peemiliona N$79.
– Nampa
