Muni gwaVenduka omwedhi gwa zi ko okwa gandja epitikilo lyomulandu gwokukondolola oombwa mondolopa, sho te keetapo iifuta yoombwa.
Ooyene yoombwa oya taamba ko etokolo ndyoka, noya popi kutya omulandu ngoka otagu ka kala gwa kondolola oombwa ndhoka hadhi kala dhi ihanena ondolopa, notashi ka kaleka ondolopa ya yela osho wo okugamenenapo oombwa.
Omulandu, ngoka ogwa pewa epitikilo moshigongi shamuni momasiku 25 gaJuni, notagu ka thiminika oombwa dhi kale dha shangithwa, dhi kale dhina iifuta yoolisensa, dhi kale hadhi pandekwa, dhikale hadhi vulu okukwatwa po nokugandjwa po, ko kukale wo taku kondololwa oombwa ndhoka dha nika oshiponga.
Kohi yomulandu ndhoka omipe, oombwa ndhoka dha thonwa otadhi kala hadhi futilwa ooN$50 komvula, omanga ndhoka inaadhi thonwa otadhi kala hadhi futilwa ooN$100 komvula.
Mwene gwombwa ontine ya thonwa otaka futa ooN$300 komvula omanga mwene gwombwa ontine inaayi thonwa otaka futithwa ooN$400 komvula.
Mboka yena oombwa odhindji ano dha konda puntano otaya ka futithwa ooN$2 000 komvula omanga mboka yena oombwa dhi li ntano otaya ka futa N$1 000 komvula.
Omukalimo gwomoShandumbala Kelly !Gorases oshiwike sha zi ko okwa popi kutya omulandu ngoka otagu ka kwathela muni a kale nomwaalu gu li mondjila kombinga yoombwa ndhoka dhi li moshilandopangelo.
“Oshinima oshiwanawa molwashoka muni ota ka vula okumona kutya omuna oombwa ngapi mondolopa. Eshangitho lyoombwa olya simana wo molwashoka aantu oyendji oya tala ko oombwa ongoshitopolwa shofamili yawo,” osho a popi ngaaka.
Omukalimo gulwe, Tracy !Gorases, okwa popi kutya ekondololo lyoombwa otali ka thiminika ooyene yoombwa ya kale yena oshimpwiyu shadho notashi ka kala oshipu ku monike ooyene yadho uuna dha monitha omuntu oshiponga momapandaanda.
Kuku Eveline Boois (80) okwa popi kutya okwa taamba ko edhiladhilo ndyoka, molwashoka oombwa odha pumbwa okugamenwa oshoka ohadhi vulu wo okugamena aanegumbo koombudhi.
Kuku Magreth Tjombe (65) naye okwa popile wo omulandu ngoka, ashike okuna eikwato kombinga yiifuta yokomvula.
“Ongomukulupe, kandina oshimaliwa onkene okufutila oombwa otashi ka kala oshidhigu. Oombwa ohadhi tu kaleke megameno molwashoka molukanda lwetu omuudha oombudhi,” osho a popi ngaaka.
Sylvia Breitenstein, omunambelewa mehangano lyokugamena iinamwenyo kaayi monithwe iihuna lyo-Society for the Prevention of Cruelty to Animals (SPCA), naye okwa taamba ko omulandu gwekondololo lyoombwa mondolopa nokwa popi kutya oveta ndjoka oya pumbiwa molwashoka opuna ooyene mboka ihaaya takamitha oombwa shawo.
“Aantu otaya kola oombwa ashike inaya hala oku dhi sila oshimpwiyu,” osho a popi ngaaka.
Okwa popi kutya shampa omulandu omupe gwa tulwa miilonga, nena otashi ka kala oshipu okumona ooyene yoombwa ndhoka tadhi kana.
Omudheuli gwoombwa, Kirsten Drew okwa popi kutya mongashingeyi mOvenduka kamuna ekondololo lyoombwa molwashoka aantu ohaya thigi omiyelo dha patuluka naashoka ohashi eta oombwa dhi kale dhi ihanena omapandaanda.
Okwa popi kutya okwa hala okuuva kutya iimaliwa mbyoka tayi zi miifuta otayi ka longithwa shike, nokwa gwedhapo kutya opwa pumbwa okutotwa oshiketha shoombwa ndhoka dhi ihanena omapandaanda.
“Ehangano lyo-SPCA ohali taamba oombwa ndhoka dha kana koshali. Muni gwaVenduka okwa pumbwa okulonga oshigwana kombinga ya nkene oombwa hadhi kaliwa nadho, ya yande okweetha oombwa tadhi vala epitilila yo ya kale wo ihaaya ningi nayi oombwa,” osho a popi ngaaka.
Omukuluntuwiliki gwoshilandopango, Moses Matyayi, okwa popi kutya omulandu ngoka omupe ogwe etwa po sho ya kala nokuyakula omanyenyeto ogendji kombinga yoombwa dhi li momapandaanda osho wo omaponokelo gaantu koombwa.
Onkalo oya ya pombanda yoombwa dhe ethelwa momalukanda pwaana ekondololo omanga dhimwe otadhi ningwa nayi, naashoka okwa li she eta omaipulo maakwashigwana.
Okwa popi kutya mOvenduka otamu tengenekwa muna oombwa dhi li po20 000, nokwa gwedhapo kutya omukanda gwuundjolowele otagu ka shilipaleka kutya oombwa ohadhi tuntilwa aluhe nodhili muundjolowele, naashoka otashi ka shunitha pevi etaandelo lyomikithi osho wo aantu ya kale ya sa oshimpwiyu shoombwa.
