Ehangano lomakwatafano opamhepo ledina Mobile Telecommunication Limited (MTC) ola patulula oshitai shopakafimbo mOkongo, osho sha eta omayakulo popepi noshiwana modoolopa nomomudingonoko.
Ombelewa ei, ya patuluka Etine, oi li imwe yomeenhele doMTC di li o40 moshilongo ashishe.
Otai pitike ovayakulwa kodoolopa oko vaha ende vali oinano ile tava ka konga omayakulo.
Ovayakulwa otava dulu okumona omayakulo mwa kwatelwa okushangifa oukalata vavo noku va ningulula ngee va kana, omaindilo eekondalaka, okufuta omayakulo avo nokulanda oulityaatya noinima ikwao.
Omupopiliko waMTC Erasmus Nekundi okwa ti ovakalimo ova kala nokuindila va etelwe omayakulo aMTC mOkongo efimbo lile.
“Otwa hafa eshi twa patulula ofitola yetu ipe,” osho a ti ngaho.
Nekundi okwa ti oshinima eshi oshi li ombinga yeenghendabala doMTC dokuxwepopeka eyandjo lomayakulo omakwatafano opamhepo moshilongo ashishe.
Omukalimo womOkongo Tangeni Shinedima okwa tambula ko oshinima eshi, ta ti otashi vatele ovakalimo vaha kale vali tava longifa oimaliwa ihapu momalweendo okuya va ka konge omayakulo kEenhana.
Epatululo loshitai eshi oli li ombinga yomafaneko aMTC okwaandjakaneka omayakulo, a kwatela mo oshitai kOmbaye, Okuryangava, Omaruru, Otjinene nOutjo.
