Minista wehongo Sanet Steenkamp okwa ti inaku lopotwa nande vali omunhu umwe a monika Okolona koDelta Primary School mOvenduka.
Eshi osha landula omunailonga wokomuhandjo kofikola oko a monika Okolona.
Steenkamp okwa lombwela oThe Namibian Etivali kutya omunailonga wokomuhandjo oo a monika Okolona ota ti po xwepo lela, omanga oministeli tai twikile okulandula omilandu dayo odo da tulwa po dokuwilika oudu ou meefikola.
“Omilandu ode lifa.
Oshinima shotete osho shi na okuningwa okulopota oudu nokukufa mo ounona, osho twa ninga meendelelo,” osho a ti ngaho.
Steenkamp okwa ti omilandu odo di na okulandulwa koministeli inadi lunduluka.
Oudu ou okwa li wa lopotwa oshivike sha dja ko, osho sha eta omuhandjo wofikola u patwe pakafimbo noministeli youndjolowele i katuke onghatu.
Konima ofikola oya lopotela ovadali novatekuli vounona kutya ovanailonga vokomuhandjo nounona otava ka pupwa nokukonakonwa, omanga ofikola aishe kwa li ya teelelwa i wapalekwe nokupombelwa.
Okwa ti okafudo kofikola kopaife otaka ti ounona kave li vali kofikola, ovahongifikola ashike ve li ko, nofikola otai ka pombelwa nokuwapalekwa.
She likolelela kuSteenkamp, ounona ova teelelwa vehe uye kofikola fiyo omomafiku 07 Septemba.
“Hakaana ka i kofikola.
Onghee nee inashi nyika naana oshiponga,” osho a ti ngaho.
Steenkamp okwa tambula ko kutya ovadali otashi dulika va kale va limbililwa sha landula omunhu oo a lopotwa a monika oudu ou ashike omilandu deameno odo da totwa pefimbo lOkolona natango odi li moilonga.
“Ondi udite ko kutya ovadali ova ngwangwana, ashike omilandu odo twa tulile po pefimbo lOkolona natango odi li moilonga,” osho a ti ngaho.
Okwa koleka kutya kapu na vali omunhu umwe a monika oudu ou eshi kwa li a dengelwa koThe Namibian.
Omupopiliko woministeli youndjolowele Walters Kamaya okwa ti oministeli otai longekida omukanda u na sha novanhu ovo va lopotwa va monika Okolona.
“Oministeli otai longekida omukanda wokoikundaneki tau ka pitifwa kombinga yOkolona notau ka pitifwa diva,” Kamaya ta ti.
