Ongudu yoAsoli Progressive Party oya holola edunai layo eshi nakufya James Uerikua kwa li ina ningwa minista, tai ti okwa li a pumbwa efimaneko lakula manga e li momwenyo.
Metumwalaka laye lomahekeleko Oshoondaxa, omuleli wongudu Joseph Kauandenge okwa yandja oushima kwaasho ta ifana “okuliningifa” sha landula efyo laUerikua, ta ti kutya ovaleli vahapu vopapolitika paife otave mu tange neenghono.
Uerikua nomonamati, Venturo, ova xulifa moshiponga shotuwa momafiku 03 Apiilili moshitopolwahoololo shaTjozondjupa.
Okudja opo, omahekeleko nomatumwalaka efimaneko aa kala taa di keembinga adishe dopolitika.
Kauandenge okwa pula kutya omolwashike Uerikua, paife ta ifanwa kutya omunamayele, e na omaano nokwa li alushe ta lalakanene oilonga yomupondo, ashike kakwa li a ningwa minista pefimbo a li momwenyo.
“Ngee James okwa li omuleli muwa ngaho, ngaashi vahapu tava ti paife, oshike sha imba ovo ve na eenghono ve mu ulike a ninge minista?” osho a pula ngaho.
Okwa indila vali oshiwana shi xulife po omukalondjiikilile wokutanga ashike ovanhu ngee va xulifa, ta pula opo va kale hava fimanekwa nokupandulwa manga natango ve li momwenyo.
Kauandenge natango okwa yandja oushima kokuninga omapako opapolitika, ta ti otaa longifwa unene okukwatakanifa, okuxwaxwameka oinima yopolitika nokuxwaxwameka omahalo opaumwene.
Okwa weda po kutya okudja pefyo lapresidente mukulu Hage Geingob, ovanamadina ngaashi Uerikua nangoloneya mukulu waKunene Marius Sheya okwa li va fa va patelwa kondje moinima ya fimana.
She likolelela kuKauandenge, kashi li mondjila ngee ovo kwa li ihava yambidida Uerikua manga e li momwenyo ve mu lile moshiwana paife.
Okwa ti oshinima osho “okuliningifa kwa shiya ko.”
