David Namwandi, omukokoli nomunashipundi woshiputudilo shopombada shedina International University of Management (IUM), okwa shiivifa kutya oshiputudilo otashi tungu oshipangelo sheembete di li 120 shopaumwene kOndangwa.
Oshipangelo eshi osha teelelwa shi patuluke mokati kodula tai ya.
Eshi kwa li ta popi koshivilo shedjalo lomanguwo kOngwediva Etitano, Namwandi okwa ti oshipangelo, osho shi li popepi nOndangwa otashi ka longelakumwe noministeli youndjolowele nomayakulo opanghalafano.
“IUM okwe lipyakidila ta tungu oshipangelo shopaumwene shi na eembete di li 120.
Oshipangelo eshi otashi ka patuluka mokati komudo 2027.
Palongelokumwe noministeli youndjolowele nomayakulo opanghalafano okwe lineekelwa kutya oshipangelo eshi otashi ka kala shimwe shomoipangelo yokuyandja omadeulo moshilongo shetu,” Namwandi ta ti.
Okwa shiivifa vali kutya oshiputundilo otashi twikile nokuya pombada eshi tashi lihanene oshilongo.
Okwa ti oshiputudilo oshi na eefikola mOhangwena, Erongo, Khomas, Kavango West nOshana, nomwaalu wovalihongi ve li 28 500 neudo.
Oshiputudilo paife oshi na eepolohalama di li 122 da tambulwa ko, mwa kwatelwa eedjapo dounongononi, oshimoko, oikwanghono, oupangi nosho yo oipambele yopaunamiti, osho a ti ngaho.
Namwandi okwa popya yoo kombinga yelitulemo laIUM momapekapeko nomoikundaneki, mwa kwatelwa nokutota endiki lomapekapeko, omadeulo noyoongalele koSwakopmund, ehangano lokuungaunga noipambele yomeva nepatululo loRadio yoshiputudilo moitopolwahoololo ya yooloka momudo 2024.
“Ehongo ola fimana unene itali dulu ashike okweefelwa epangelo olo alike.
Onghee nee IUM ota wanifa po oshinakuwanifa shaye shomoshiwana shokushakeneka epangelo mokutungulula eliko letu.
“Onghee nee ohatu udaneke kutya itatu sholola fiyo ondjodi ei ya twa,” osho a ti ngaho.
Omwaalu wovalihongi ve li 1 225 owa djala omanguwo Etitano, omanga ve li 2 060 va teelelika va djale omanguwo mendjalo lomanguwo tali shikula ko mOvenduka, osho tashi eta omwaalu aushe kumwe u kale u fike po3 285.
-NAMPA
