Ongudu yoIndependent Patriots for Change (IPC) oya pula oministeli yoikwanghono i fatulule nawa etokolo layo lokutofa mo ehangano lomahooli lopaunyuni ledina Vitol opo li kale olo ashike tali landifa omahooli kuNamibia.
Minista woikwafaabulika, oikwamina noikwanghono Modestus Amutse okwa shiivifa eudafanotwokumwe lomahooli nehangano e li ledina Vitol Etitano. Ta ti eudafanotwokumwe otali ka vatela epangelo li xupife eemiliona.
Ashike nee, oshinima eshi osha eta omanyenyeto okudja koshiwana shaashi omulandu wotendela kakwa li wa ningwa pauyelele.
“Epangelo nali fatulule nawa kutya oshike otendela yomahooli opashiwana youle weemwedi nhatu kwa li ya yandjwa puhe na ovakondjifi nomulandu oo tau ka wilika ewedelo layo okudja momafiku 30 Septemba,” Rodney Cloete ta ti.
Okondalaka noVitol oya teelelika i xule muSeptemba, omo oministeli ya teelelika i tule po omalandulafano ape okulanda omahooli ahapu oshilongo.
Cloete okwa pula Amutse a fatulule eemhango nomalandulafano aeshe eudafanotwokumwe noVitol, mwa kwatelwa nomukalo weendado.
“Vitol ehangano li shiivike: MuDesemba 2020, ehangano okwa li la itavela kutya ohali futu ovanambelewa moilongo.
Ou oye omunhu twa hala okulineekelela ewiliko lokulanda omahooli etu, mokondalaka imwe yopaholamo, puhe na omulandu wokukufa ombinga wa ningwa moshiwana,” Cloete ta ti.
Okwa holola vali omalimbililo kombinga yoshinakuwanifa shaminista oye auke shokuhoolola ovalandifi vomahooli nokuwilika omilandu dokukufa ombinga.
Nasan Ernegies, ehangano olo la pitikwa mafiku aa li lande oitaashi yomahooli i li 52, inali pitikwa li lande omahooli koVitol oule womido nhano, oshinima osho sha tulwa po koNamibian Competition Commission.
“Minista oye tuu ou a yandja oshinakuwanifa eshi koVitol, paife ngaha, oye ngaa omunambelewa ta tokola eindilo loNasan Energies lokuningulula engabeko lomido nhano olo la tulwa po kokomisi yetu yokukwashilipaleka kutya ovanhu aveshe ova kufa ombinga pauyuki kombinga yaNasan ta lande omahooli koVitol,” Cloete ta ti.
Okwa ti eudafanotwokumwe e li “epulo ashike li na sha nomulandu wouyuki”.
