Opolisi yaNamibia mEtitano oya tseyitha kutya iipongolo mbyoka yi itsuwika popepi nomudhingoloko gwaTjomuise mOvenduka omasiku ga zi ko oyomulumentu Beatus ‘Tuna’ Iiyambo (25) ngoka kwa li a kana petameko lyomumvo nguka.
Pauyelele wopolisi, konima sho iipongolo mbyoka kwa li yi itsuwika momasiku 18 Auguste, opolisi okwa li ya tameke nomakonakono gomuule goDNA okushilipaleka kutya oya lye.
“Iipongolo mbyoka oya hololwa kutya oya Beatus Iyambo, sha ningwa okupitila momakonakono goDNA,”osho omupopiliko gwopolisi moshilongo, omupevikomufala Kauna Shikwambi a popi ngaaka.
Okwa gwedhapo kutya omakonakono gokutseya osheetithi sheso onkene ge li metifa notaga ka tseyithwa moshigwana uuna ga manithwa.
Omasiku ga zi ko opolisi oya tseyitha kutya opuna iipongolo yi itsuwika melundu ano ookilometa dhi li puhetatu muuninginino waTjomuise opwa adhika uuthemba waTuna.
Shikwambi, pethimbo ndyoka okwa popi kutya oodokumente dha adhika piipongolo mbyoka ongaashi okatse koshilongo, ombulukweya yokaki, ombindja yoPuma, uutapa, uukalata uyali wombaanga, okakalata komahogololo osho wo oshimaliwa koomuma.
Iipongolo mbyoka otaku hokololwa kwa li yi itsuwika komulumentu ngoka kwa li ta litha iikombo momudhingoloko gwaSatanslog – ano melundu lyi li mokati koondundu.
Tuna okwa li a lopotwa a kana momasiku 12 gaJanuali, esiku owala lya landula ndyoka eya moshilandopangelo okuza konooli yoshilongo, noshiningwanima shoka okwa li she eta omapulo ogendji moshigwana tashi pula ngoka e na mo olunyala e ye puuyelele.
Tuna, ngoka a yambukile momukunda Onakaheke moshikandjohogololo shaKahao – moshitopolwa shaMusati, okwa zi konooli sho taku hokololwa a monenwa iilonga komunangeshefa gwomOtjomuise Matheus Shapaka opo a kale ta landitha okapana nokukwathela yilwe pondingosho ye.
Pauyelele wa zi kaakwanezimo, Shapaka otaku hokololwa a dhengele yina yaTuna, Rauha Uugwanga, esiku a thika mOvenduka, oku mu tseyitha kutya omwana okwa thik nawaa.
Esiku ndyoka sho Tuna a lala maandjawo yaShapaka sho owala a thika, Shapaka okwa popi kutya [Tuna] ina kotha mo molwashoka okwa kala owala ti igitha omadhina gaantu yokomukunda gwawo nokupopya kutya ‘okuwete iinima’.
Esiku lya landula sho kwashi, Shapaka okwa popi kutya Tuna okwa kana nokwa li a ningi onkambadhala yoku mu konga ashike ine mu mona, shoka she etitha a lombwele aakwanezimo osho wo okutseyitha opolisi.
Osho oshikando shotango Tuna kwa li e ya mOvenduka, naakwashigwana okwa li ya ningi ehololomadhiladhilo pondingosho yaShapaka taya pula omayamukulo.
Sigo oompaka kapuna uuyelele tawu ulike ngele opuna ngoka e na olunyala mekano lye.
